Насловна

А2 ќе продолжи каде што запре А1

Откако телевизијата ги намири долговите кон државата, се подготвува нова програмска шема

Новитети во презентирањето на вестите, нови серии и изненадувања се подготвуваат на каналот на телевизијата А2, која од средината се очекува да стартува со збогатена програма. Најавите се дека тимот ќе се консолидира во наредните неколку недели, но дека ќе се задржи програмската шема која што беше препознатлива за телевизијата А1, која неодамна згасна. На ТВ-екраните се најавува дека ќе се појави поголем дел од новинарскиот кадар кој работеше во А1, но ќе има и освежувања.

Извори од телевизијата, која зрачи само на сателитските и на кабелските оператори, велат дека се подготвуваат изненадувања за гледачите, новитети во информативната програма и нови играни серии.

„А2 се подготвува да биде поурбана, поградска телевизија која ќе го задоволи вкусот на гледачите“, велат извори од телевизијата.

Управителот на А2 Тони Николовски вели дека датумот кога ќе стартува телевизијата со новата програмска шема се' уште не е познат. Информациите што се појавија дека тоа ќе се случи на 15 септември, според него, се шпекулации.

„Не постои точна прогноза кога ќе стартува програмата. Засега работи на консолидација на тимот и на програмата и во тек се нашите редовни активности околу тоа“, вели Николовски.

Можноста за проширување на програмската шема на А2 се отвори откако во петокот телевизијата го плати долгот кон УЈП и кон Советот за радиодифузија, во износ од 100 илјади евра, со што ја одблокира сметката и ја продолжи дозволата за работа.

Долгот завчера го плати Томор Цаноски, сопственик на повеќе угостителски објекти и брат на пратеникот Фијат Цаноски. Парите се дадени како краткорочна позајмица, за што е склучен договор на нотар, со рок за враќање од една година. Фамилијата Цаноски тврдеше дека нема намера да ја купи телевизијата, ниту да се вклучува во нејзината работа. Извори од А2 велат дека се' уште останува отворена опцијата за продажба на телевизијата, за која имаше информации дека е заинтересира странска фирма. (Д.Т.)