Нерационална потрошувачка, редукции на вода

ТЕТОВО - Во Тетово се воведени редукции на водата за пиење. Од вчера вода во градскиот водовод нема од 16 до 17,30 часот и во утринските часови од 4 до 5,30 часот. Сувите славини во одредени периоди од денот и ноќта се исклучиво поради злоупотреба во користењето на водата.

„Во Тетово дотекуваат 400 литри вода во секунда, што се смета за доволно ако се користи рационално. Меѓутоа, големите горештини го направија своето. Количините не се доволни затоа што има нерационална потрошувачка, се наводнуваат дворови и бавчи. Од тие причини се јавуваат проблеми во редовното снабдување, особено на повеќекатниците и повисоките делови на градот. Недостигот најмногу се чувствува во Мала Речица, Купеник, Дреновец и улицата 146“, изјави вчера Хасан Љума, директор на ЈКП „Тетово“. За да се намали нерационалната потрошувачка, три возила секојдневно ќе ги полеваат улиците и тротоарите во градот. Освен тоа, ќе има засилени екипи од Комуналната инспекција и службата за контрола на ЈКП кои ќе ја контролираат потрошувачката и по потреба ќе поднесуваат пријави за ненаменско трошење вода.

„Граѓаните треба да ја почувствуваат потребата од солидарност со сите жители. Така редукциите ќе се прекинат и сите ќе имаат вода“, нагласи Љума. (Г.Е.)