Шврговски бара докази од Рамковски

„Ќе побараме информација и од Владата за сите обвинувања на сопственикот на А1“, вели државниот обвинител

Гордана Дувњак


Државниот јавен обвинител Љупчо Шврговски го повика сопственикот на А1, Велија Рамковски, да ги достави доказите за тврдењата дека премиерот Никола Груевски ги плаќал партиските реклами со буџетски пари.

По викенд писмените реакции од Владата и од ВМРО-ДПМНЕ, вчера со изјава околу наводното трошење на буџетски пари за партиски цели, се огласи и вицепремиерот. Во отсуство на премиерот Никола Груевски, кој е на службен пат во Триполи, министерот за финансии, Зоран Ставревски, го обвини Рамковски дека на ваков начин сака да го одвлече вниманието од финансиските малверзации направени на улица „Перо Наков“.

„Деновиве се изнаслушавме најразлични меѓусебни обвинувања и мислам дека е најдобро ако Рамковски има докази, веднаш да ни ги достави, зашто на тој начин многу ќе ни олесни“, рече Шврговски во изјавата за „Утрински весник“.

Шврговски вели дека имал можност на телевизија да го слушне тврдењето на Рамковски во интервјуто, кое било и репрезирано, но би било многу пополезно доколку сопственикот на А1 им донесе докази од кои може да се утврди веродостојноста на кажаното.

Обвинителството и во овој случај ќе постапи на стандарден начин и по службена должност ќе се обиде да ги провери тврдењата. А, уште од петокот е задолжено и скопското обвинителство да отвори предмет.

„Ќе побараме информација за сите обвинувања на сопственикот на А1 и од Владата, како и увид во сите трансакции околу плаќањето владини реклами“, додава Шврговски.

Според вицепремиерот Зоран Ставрески, обвинувањата на сопственикот на А1 телевизија имаат цел да се одвлече јавноста од направениот криминал. „ Временската дистанца и околностите во кои се соопштува ова е доказ дека само се сака да се одвлече вниманието од организираниот криминал и финансиските малверзации, направени во неколку фирми“, истакна Ставрески.

Опозицискиот СДСМ, пак, вчера го повика и охрабри Обвинителство да отвори соодветна постапка и врз основа на принципот на „допрен глас“ да ги испита јавно изречените тврдења за евентуалниот криминал на премиерот Груевски.

„Ова е огромна афера без преседан. Досега Груевски и ВМРО- ДПМНЕ криеја колку народни пари и од кои буџетски ставки трошат на себерекламирање. По изјавите на Рамковски, тој не може повеќе да ги скрие овие податоци“, рече на прес-конференција професорката Ана Данева-Павловска.

Таа го повика Груевски да излезе и да каже колку милиони евра народни пари им исплатил на медиумите.

„Сите обиди на Груевски и на ВМРО-ДПМНЕ и натаму да ги кријат овие податоци ќе завршат безуспешно, бидејќи по смената на власта, ќе се утврди точно колку народни пари се потрошени и од кои буџетски ставки“, нагласи Данева-Павловска.

Рамковски во интервјуто за телевизијата рече дека во хајката што се водела против него било кажано дека му се платени дваесет и пет милиони евра за рекламирање. „Во три години не се повеќе од четири милиони, а создаваше атмосфера на 25 милиони. Во тие четири милиони имаше и партиски пари од буџетот што ми ги плати, тоа го знае и тој. Не правам јас криминал, тој го правеше криминалот“, рече тој.

Според него, ова се случувало во првите три години од владеењето на ВМРО-ДПМНЕ до средината на 2008 година.

Сомневањата се уште поголеми ако се знае дека државниот ревизор констатираше дека само од сметката на Владата, каде што одговорно лице е Никола Груевски, во 2007 и во 2008 година биле потрошени огромни 18 милиони евра народни пари на рекламни кампањи.