Деми Мур

Контроверзни детали во биографијата

Деми Мур неодамна почна да пишува книга, а со тоа планира да ги подели со јавноста повеќе непознати детали од својот приватен живот и кариера. Откако се распраша и помина разговарајќи со различни издавачи, Деми одлучи својата книга да ја објави за „Харпер Колинс“, кои и' дадоа најдобра понуда, па актерката од издавачката куќа треба да добие дури два милиона долари. Деми се' уште не смисли име за својата автобиографија, но се знае дека книгата ќе биде објавена во 2012 година.

Низ своите мемоари Мур ќе го прикаже проблематичните односи што ги имаше со мајката-алкохоличарка Вирџинија Кинг, но и со очувот Дени Гајнес, поради кого семејството се селело на 40 различни локации. Родителите постојано пиеле, се карале и се тепале, се' до моментите кога Гајнес не извршил самоубиство. Се очекува во биографијата да се најдат и нејзините зависнички денови и отказот што го доби од режисерот Џоел Шумахер поради појавувањето на едно од снимањата во тотално кокаинско лудило.

Како дел од темите, во текстовите од книгата ќе бидат опишани и нејзините три досегашни бракови. Откако се разведе од Фреди Мур, чие презиме се' уште го носи, актерката во 1987 година се венча со Брус Вилис, со кого има три ќерки. При породувањето со првото дете таа најми тројца камермани за да ја снимаат во породилната соба и да го овековечаат тој посебен момент. Бракот со акционата ѕвезда пропадна по 13 години, па од 2005 година е венчана со Ештон Качер, 15 години помлад од неа, со кого, според една нејзина неодамнешна изјава, сака да има уште деца. Своевремено, актерката беше опседната и секојдневно коваше заговори дека младиот маж со сигурност ќе ја изневери.