Дете почина попарено од врела вода

Мајка ја попарила ќерка си капејќи ја во врела вода во шарпланинско Ново Село

Гојко Ефтоски



ТЕТОВО – Тригодишно девојче почина од изгореници при капење со врела вода. Семејната трагедија се случила во шарпланинското Ново Село кога мајката капејќи го детето во бањата, пуштила врела вода, која на тригодишното девојче му нанела смртни изгореници. И покрај обидите на родителите да му го спасат животот на детето, несреќното девојче починало на пат кон тетовската Клиничка болница.

Се' се случувало во бањата во семејна куќа на семејството Муртезани. „Триесет и тригодишната Р.М. во петокот околу 13,30 часот сакала да ја избања својата ќерка, но не сакајќи, пуштила врела вода врз неа. Водата предизвикала изгореници по кожата на несреќното дете“, велат во МВР.

Во обид да му помогне, мајката го премачкала девојчето со масло за јадење и со некоја друга непозната течност. Ја завиткала тригодишната ќерка со пелени, ја легнала и ја покрила со јорган. Наредниот ден забележала дека здравствената состојба на девојчето се влошува.

За случката му кажала на сопругот Д.М., кој веднаш се упатил за Тетово. Но, се' веќе било попусто. Полицијата била известена за случајот од лекар од Клиничкиот центар од Тетово, кој пријавил дека кај нив е донесено починато девојче од тетовско Ново Село. Врз телото на девојчето во саботата била извршена обдукција. Според наодот, смртта настапила како последица на трауматски шок од изгорениците како резултат од невнимание на мајката. Тетовската полиција извршила увид и работи на расветлување на сите детали поврзани со случајот.