Славески најљубезно му се заблагодари на Спасеноски
(Повод: текстот "Славески го избрка Спасеноски од Комисијата за буџет", објавен во "Утрински весник" на 2 декември 2008 година)
Министерство за финансии, Кабинет на министерот
Најостро демантираме дека "министерот за финансии Трајко Славески го избрка од Комисијата за финансирање и буџет неговиот колега за земјоделство, Ацо Спасеноски, со објаснување дека предолго ги образложувал амандманите", како што имплицира авторот на текстот Александрија Стевковска.
Секој што го следеше директниот пренос од работата на Комисијата за финансирање и буџет можеше да слушне дека министерот Славески најљубезно му се заблагодари на министерот Спасеноски за неговите излагања. Притоа, министерот Славески истакна дека како овластен претставник од Владата за Предлог-буџетот на Република Македонија за 2009 година, а поради негово отсуство во текот на утринските дискусии на Комисијата, ги поканил министерот за транспорт и врски и министерот за земјоделство да учествуваат во амандманската расправа за Предлог-буџетот, која се однесуваше на овие два владини ресора.
Причината поради која министерот Славески му се заблагодари на министерот Спасеноски за присуството е тоа што опозициските пратеници го злоупотребија присуството на министерот Спасеноски и наместо да дискутираат за амандманите, започнаа расправа за други теми од областа на земјоделството, со што свесно ја блокираа расправата на Комисијата за финансирање и буџет по однос на амандманите.
|
