Искричења во парламентарните комисии по ветото на Црвенковски
Светлана Унковска
На опозициската СДСМ вчера не и' успеа да ги стави на дневен ред на Законодавно-правната комисија и на Комисијата за политички систем законите за енергетика, за работни односи, за адвокатура, за лобирање, за експропријација и законот за надворешни работи, чии укази претседателот Бранко Црвенковски одби да ги потпише.
Владејачкото мнозинство со надгласување го отфрли предлогот, па така пропадна можноста не само да се дискутира за овие закони туку и да се поднесуваат амандмани.
Од СДСМ велат дека не се откажуваат од намерата повторно да се чешлаат овие закони. И покрај настојувањето на претседателот на парламентот, Трајко Велјановски, да нема амандмани, СДСМ ќе инсистира и на амандмани и на уште една рунда дебата.
„Тоа што го бара Велјановски нема никаква реална основа. Нашата цел ќе биде овие шест закони, кои се многу важни, да бидат подобрени. За овие закони имаат забелешки синдикатите, адвокатите, невладините организации, претседателот на државата“, рече вчера Игор Ивановски, потпретседател на СДСМ.
Ивановски вели дека ќе инсистираат „на разумна процедура“. „Тоа што претседателот на Собранието го чита Деловникот онака како што сака е само еден вид политичко насилство“, изјави тој, додавајќи дека за опозицијата е најважно да ги расчисти системските проблеми во Собранието за тоа „да не биде и натаму експозитура на Владата“.
Но, и владејачката ВМРО-ДПМНЕ не отстапува од ставот дека парламентот нема, како што велат, надлежност да расправа за овие закони. Додека СДСМ се повикува на недореченостите во стариот Деловник и бара да се постапува во согласност со одредбите од новиот Деловник каде што е пропишана процедура во врска со вето од претседателот, ВМРО-ДПМНЕ не попушта.
Револтирана од односот на владиното мнозинство, Цветанка Иванова од СДСМ ја праша претседателката на Законодавно-правната комисија од ВМРО-ДПМНЕ, Благородна Дулиќ, која е целта на суспензивното вето од шефот на државата ако не се дебатира за неговите забелешки, односно не биде подобрен законскиот текст.
„Должни сме да се придржуваме кон процедурата. По непотпишувањето на указите, законите само се гласаат во парламентот, а отворањето расправа во собраниските тела е можно само за предлог-закони. При третото ’читање’ на законите не постои можност за расправа“, возврати Дулиќ.
|
