Кралска венчавка

Се омажи внуката на британската кралица

Зара Филипс, најстарата внука на британската кралица, се омажи за рагби-ѕвездата Мајк Тиндал на церемонија во главниот град на Шкотска, Единбург. Само три месеци по свадбата на принцот Вилијам и војвотката од Кембриџ, Кејт, британското кралско семејство викендов одново се собра на уште една кралска венчавка.

Меѓу гостите на церемонијата во катедралата „Кенонгејт Кирк“ беа кралицата Елизабета Втора, принцот Чарлс и Камила Паркер, принцот Вилијам и неговата сопруга Кејт, принцот Хари, принцезите Евгенија и Беатрис... Невестата носеше венчаница во боја на слонова коска, која за неа специјално ја дизајнираше креаторот Стјуарт Парвин, познат шкотски дизајнер. При влезот во црквата таа имаше и долг превез под кој се наѕираше дијамантска тијара што ја доби како подарок од својата мајка Ана.

На втората кралска венчавка оваа година беа присутни и гајдаџии со традиционална шкотска музика, а пред црквата имаше стотици граѓани со англиски знамиња. Среќните младенци се бакнаа на излезот од црквата, додека масата ги поздрави со аплауз.

Триесетгодишната Зара Филипс е ќерка на принцезата Ана и нејзиниот прв сопруг Марк Филипс. Таа и Мајкл ја објавија својата свршувачка кон крајот на минатата година, а во врска се веќе неколку години.