„Елдорадо“ и „Слепа љубов“ вечерва на „Синедејс“
Вечерва во рамките на филмскиот фестивал посветен на современиот европски филм, „Синедејс“, во 17 часот, во киното „Фросина“ ќе биде прикажан босанскиот филм „Чувари на ноќта“, како дел од програмата „Балкан линк“ која го претставува најдоброто од најновата регионална кинематографија. Во рамките на ревијалната програма фокусирана на холандскиот филм, во киното „Милениум“, ќе бидат прикажани два краткометражни и два долгометражни филма. Проекцијата на филмот „Дуља и Деси во Мароко“ е од 18 часот пред кој ќе биде прикажан краткиот филм „Желба“, додека од 20,30 часот е филмот „Скин“ пред кој ќе биде прикажан краткометражниот филм „Контакт“.
Вечерва ќе бидат прикажани два филма од главната програма чии проекции одат во киното „Фросина“. Од 19 часот е словачкиот филм „Слепа љубов“ кој говори за љубовта помеѓу двајца слепи луѓе. „Елдорадо“, пак, кој ќе биде прикажан од 21,30 часот е француско-белгиска копродукција, кој на многу интересен начин раскажува за едно чудно пријателство и патување на двајца бесполезници низ импресивна и истовремено налудничава земја. (Л.М.) |
