Насловна

Грција да ја почитува Македонија како земја-кандидат

Грција, како земја-членка на Европската унија, да се однесува европски кон Македонија како кандидат за влез во Унијата, побара македонскиот претседател Ѓорге Иванов од Црна Гора каде што се одржува Самитот на шефови на држави и влади од процесот на соработка во Југоисточна Европа. „Секогаш го потенцираме проблемот што го имаа Словенија и Хрватска и како тие најдоа решение и се повикуваме на тоа искуство и бараме секоја членка на ЕУ да се однесува европски спрема кадидатите“, изјави Иванов, барајќи го тоа и од Грција.

Иванов притоа изјави дека Македонија останува доследна на своите трајни и врвни цели и приоритети, водејќи се притоа од основниот принцип на отвореност и блискост со сите. Од Свети Стефан Иванов ја пр��ти пораката дека целите на Македонија се јасни, а тоа се полноправно членство во НАТО и ЕУ, развивање извонредни односи со сите свои соседи, учество во сите регионални иницијативи, отвореност кон светот, кон меѓународната заедница, кон сите, по што резултатите не изостануваат. Според Иванов, предвремените избори покажале дека мнозинството граѓани ги поддржале тие цели, што претставува обврска за новата влада.

Иванов од Црна Гора испрати порака дека најголемата моќ на регионот и на Европа е во нејзината отвореност и обединетост, додека најголемата опасност за нив демне од затвореноста и поделеноста. „Само заеднички можеме да ги решиме прашањата како регионалната енергетска поврзаност, заедничките транспортни коридори, заедничката железничка инфраструктура“, рече тој. Според него Балканот мора да функционира како обединет регион, дел од обединетиот европски пазар и важна алка во европската комуникација кон светот. „Без интеграција на нашиот регион не можеме да зборуваме за целосно успешен и заокружен процес“, изјави Иванов, додавајќи дека на регионот му е потребна поддршка за продолжување на интеграциските процеси.

Македонија, која од идната година ќе претседава со ПСЈИЕ, како што најави Иванов, ќе ги отвори темите за кои има интерес, тоа, пред се', се елементарните непогоди и справувањето со нив. (Н.Р.)