Државниот врв се растрча низ Европа

Претседателот, премиерот и шефот на дипломатијата во политичка офанзива за препораката на ЕК

Македонскиот државен врв се растрча низ Европа за да ја спаси препораката на Европската комисија што, според сите најави, ќе се најде и во идниот извештај на Унијата со шанси да добие пресуда во Советот, како и минатата година. Со ист текст и иста порака претседателот Ѓорге Иванов престојуваше во Естонија, шефот на дипломатијата Антонио Милошоски во Унгарија, а премиерот Никола Груевски утре ќе престојува во Брисел на самитот на народните партии и ќе има средби во Европската комисија.

На средбите во Талин претседателот Иванов порачал дека Македонија очекува фер третман од земјите на ЕУ, таков каков што имаат другите кандидати за членство и на декемврискиот самит да го поддржат интегрирањето на Македонија, така што позитивните примери за решавање на билатералните спорови да бидат применливи и за нас. Според Иванов, Македонија не по своја вина се нашла во тој спор, и не по своја вина не може да излезе од него. Тој истакнал дека од македонска страна има подготвеност за решение, дека до него може да се дојде со политичка волја и конкретни чекори во процесот, дека Македонија дава идеи и иницијативи, но оти очекува фитбек од Грција. За естонскиот претседател билатералните спорови не треба да бидат пречка за интеграциските процеси и за почеток на преговори, но дека реално постои проблем за кој Естонија може да даде поддршка, но таа е со ограничена моќ. Во Будимпешта, пак, шефот на дипломатијата, Милошоски, се повика на награда за државата поради реформите, а не на некаков божикен подарок од ЕУ.

„Македонија не бара, ниту очекува божикен подарок од ЕУ, туку прогрес, чекор напред, како валоризација за сработеното и спроведените реформи“, изјави Милошоски по средбата со неговиот унгарски колега Јанош Мартоњи. „Посакуваме да ни се даде она што го заслужуваме со оглед на постигнатото во последните 20 години“, нагласи тој додавајќи дека проширувањето на Унијата не треба да биде заложник на ирелевантно прашање, како што е грчкиот спор околу името.

Тој изрази уверување дека за време на унгарското претседателство со ЕУ, македонскиот случај, како што рече, ќе го добие заслуженото внимание.

Во врска со македонско-грчкиот спор, Мартоњи ги охрабри двете страни побргу да најдат решение.

„Македонија, земја-кандидат за членство од 2005 година, е подготвена за почеток на преговорите, но меѓу неа и една членка на Унијата има отворено прашање. Ги охрабрувам двете страни што побргу да најдат решение“, рече унгарскиот министер.

„Германија ја поддржува Македонија на нејзиниот пат кон НАТО затоа што сметаме дека се направени многу важни и добри чекори во тој правец. Многу сме заинтересирани да се најде компромисно решение за името, бидејќи тоа донекаде е поврзано со прашањето на целокупната стабилност на Балканот“, изјави министерот за одбрана на Германија, Теодор цу Гутенберг, по средбата во Берлин со министерот за одбрана, Зоран Коњановски.

„Ја слушнав подготвеноста од македонска страна за пронаоѓање компромис, останува да се надеваме дека и другата страна ќе ја покаже истата подготвеност“, рече Гутенберг. (Н.Р.)