Поглед

Армани од нашиот сокак

Љупчо Поповски

Александар Ношпал можеше и друг пример да даде кога презадоволен го објаснуваше изворот за својата инспирација за новите униформи на македонските гардисти. Големиот Армани и неговата униформа за италијанските карабинери бил музата на нашиот креатор. Но, има речиси едногласен заклучок меѓу модните умови дека Хуго Бос во 1930-те го направил најдобриот дизајн на некоја воена униформа – онаа за СС-офицерите во нацистичка Германија. Ѕверствата што ги правеа луѓето под тие униформи се приказна за изопаченоста на умот, а не за брилијантната креација.

Нашиот министер Зоран Коњановски има големи шанси неговото шефување со одбраната да остане запаметено најмногу по промоциите на нови униформи. Нема две години кога модели парадираа во нови униформи слични на американските. Чекавме, чекавме и тие униформи не стигнаа. Тешко се наоѓало квалитетно платно. Просто да не веруваш – не може да се најде платно во светот за македонските капи. Какви стандарди сме имале ние, не може никој во светот да ни ги исполни.

Сега дојде време за нови униформи. Кога нема членство во НАТО, кога нема вложувања во нови оружја, кога нема станови за војниците, кога речиси и нема касарни, најважно е да има нови униформи. Ношпал треба да биде навреден ако не го викнат на модните писти во Милано и во Париз по оваа креација – па, кој светски креатор може да ја поврзе македонската фаланга од пред 2.300 години со шубарата на дедо Иљо Малешевски. Што треба да бидат гардистите – војници или манекени што носат чудни креации правени по налудничави желби.

Тоа е Македонија – во овој маѓепсан круг на разни глупости униформите на гардистите треба да бидат една од поголемите глупости.