Поглед

Навалица за џабе

Снежана Калабакова

Жичарницата од Средно Водно до Милениумскиот крст во последно време, веројатно, е најпосетениот објект во градов. Пред базната станица постојано има редица луѓе. Трпеливо чекаат да се качат на гондолите што за шест минути ќе ги однесат до крстот. Меѓу нив се најбројни пензионерите и тоа оние што имаат право на бесплатно возење, жените над 62 години и мажите над 64. Истите оние што секој вторник и петок имаат право на бесплатно или џабе возење во автобусите на ЈСП. Бидејќи ова претпријатие сега стопанисува и со жичарницата, ја почести оваа група граѓани со уште едно задоволство и им ги разубави пензионерски денови.

Просто неверојатно е колку е голема нивната заинтересираност за жичарницата, особено на оние што досега поради неможноста да одат пеш го немаа видено одблизу ниту крстот на Водно. Не мора да потрошат ниту денар за да си направат убав пикник на Водно со домашни печива и нешто за освежување. Во гондолите на жичарницата влегуваат само најхрабрите, но и оние што немаат проблеми со крвниот притисок, вртоглавици или други проблеми од планинската височина.

Има и такви што, понесени од желбата да го доживеат ова ново задоволство во градов и во нивниот живот, не се грижат дали ќе добијат покачен крвен притисок, бидејќи таблетите и апаратите за мерење притисок им се при рака. На бабите и дедовците сега им се придружија и учениците, ослободени од обврските за учење. Покрај посета на базените и на Градскиот парк, сега во летниот распуст нова содржина за нив е и жичарницата на Водно.

Летото е период кога низ Скопје транзитно поминуваат поголем број туристи, домашни гости што, исто така, сакаат да ја видат новата градска атракција. Посетата е масовна и ги надмина сите очекувања.