Плоштадот „Скендер-бег“ да се поврзе со ТЦ „Мавровка“

Поврзување на плоштадот „Скендер-бег“ со ТЦ „Мавровка“ е една од идеите што ја предложиле граѓаните во канцеларијата што се наоѓа во општината Чаир. Идејата, веројатно, дополнително ќе го отвори и прашањето каде да биде лоциран амфитеатарот, а каде паркиралиштата. Канцеларијата ќе биде отворена во Чаир само уште една недела и во неа секој заинтересиран ќе може да ја изнесе својата идеја за новиот плоштад. По 1 декември ќе се анализираат сите пристигнати сугестии, а оние што ќе можат да се вклопат во планот, можно е да влезат и во конечното идејно решение за плоштадот.

„Неодамна пред професорите и студентите на Американ колеџ го презентиравме проектот за плоштадот и оттаму добивме една необична сугестија за поставување инсталации на плоштадската површина. Идеите одеа дотаму да се постават различни објекти, згради што би го оформиле платото во еден многу комплициран контекст. Всушност, идејата е поставување привремени инсталации. Во секој случај, јавната дебата ќе даде и повеќе предлози и сугестии што треба да влезат во главното решение“, вели Никола Стрезовски еден од архитектите на идејното решение на плоштадот.

Тој додава дека надлежните во општината финално ќе одлучат какво ќе биде конечното идејно решение што треба да се вклопи во главната замисла, која треба да е во согласност со ДУП и во рамките на тоа што тој ги определува. (Сн.К.)