Премиерот добил рок за реформите

За ЕУ било деморализирачки што се користи името како изговор за неостварувањето на реформите

Тамара Грнчароска


Груевски го уверувал еврокомесарот за проширување, Штефан Филе, дека до 20 јули Македонија ќе направи исчекор во клучните реформи на патот на земјата кон ЕУ, особено во делот на политичкиот дијалог и измената на собранискиот деловник. На долгата средба што ја имале Филе и Груевски во четвртокот во Брисел еврокомесарот го потсетил македонскиот премиер дека треба да се фокусира на реформите клучни за иднината на земјата, како што е судството, јавната администрација, борбата против корупцијата, политичкиот дијалог, информираше вчера евроамбасадорот во земјава Ерван Фуере.

„Премиерот даде уверувања дека до јули, до Советот за стабилизација и асоцијација ќе има зголемени напори за да се испорачаат некои од овие критични реформи, особено политичкиот дијалог, обезбедување дека проблемите во Собранието се решени и дека деловникот, конечно, е договорен еднаш засекогаш во духот на компромис“, информираше Фуере.

Високи извори од Делегацијата на ЕК во Македонија информираат дека доколку до 20 јули не се покаже придвижување во позитивна насока во реформите, Македонија нема да може да се надева на позитивен извештај од Комисијата наесен. Според нив, назадувањето, забавувањето или сличните зборови што се користат за она што се случува со македонските реформи се сериозни, но оти земјава од највисоко ниво дала ветување дека ќе ги исполни задачите до крајот на јули.

На средбата, како што се дознава, Филе го охрабрил Груевски да ги интензивира разговорите со Грција на билатерално ниво, со оцена дека изнаоѓањето решение за спорот ќе даде позитивен импулс на евроинтегрирањето на земјата. Придвижување на работите околу преговорите за името, според високи извори во делегацијата на ЕК во земјава, би можело да ја стави Македонија како точка на дневен ред на состанокот на министрите на ЕУ на 27 јули. Токму статус кво ситуацијата во преговорите меѓу Македонија и Грција, како што се дознава, е причината поради која Македонија ја немаше во заклучоците на Советот на ЕУ во четвртокот.

За Фуере, пак, неспоменувањето на Македонија во заклучоците на Советот на ЕУ не е нешто негативно, туку само резултатот на таков развој на настаните што не му овозможи на Советот да преземе какви било активности, што, од друга страна, претставува охрабрување до двете земји да продолжат со контактите.

Извори од Делегацијата се на став дека е многу деморализирачки тоа што спорот со името не се решава и што во земјава често се користи како параван за да се скријат слабостите и неисполнетите реформи. Како последен таков пример тие го наведуваат вицепремиерот за европски прашања, Васко Наумовски, и неговиот одговор на интерпелацијата во Собранието во понеделникот кога тој наместо да одговара за застојот во реформите, зборуваше за блокадата од Грција.