Вандали обезглавија бисти на првоборци во Битола

Засега непознати сторители дивееле на потегот од градското шеталиште до Тумбе-кафе

БИТОЛА - Обезглавени бисти на првоборци од Втората светска војна, искршени мермерни плочи, откорнати клупи и кошници за ѓубре, уништени канделабри. Во ваков хаос, по дивеењето на засега непознати вандали, вчера изутрина осамна градското шеталиште во Битола. Грдата слика што ја оставиле хулиганите зад себе се забележува се' до Тумбе-кафе.

Уништени се бистите на народните херои Пецо Божиновски, Панде Кајзерот, Коле Канински и Борис Стрезовски, инаку дел од алејата со 26 обележја на борци од Втората светска војна, распоредени од спортската сала се' до олимпискиот базен.

Битолчани се шокирани од глетката. Не паметат вакво сквернавање на спомен-обележја, иако има зачестено уништување на урбаната опрема во паркот. Жителите на Битола со гнев и жалење го осудија ваквиот чин.

„Битола не го заслужува ова, нели се гордееме со епитетот конзулски град. Секој нормален човек би го осудил ваквото дивеење“, реагираше актерот Патар Мирчевски, кој вчера тргнал на прошетка низ паркот за да ужива во шеталиштето и убавините на Тумбе-кафе.

Шеесет и осумгодишниот битолчанец Драган Наумовски не памети ваква катастрофа. „За ова треба да се измисли Голи Оток. Ова е дело на дрогата“, додава тој. „Фрапирана сум. Останав без зборови. Ужас“, рече битолчанката Ната Ѓоргиевска.

Уништувањето и сквернавењето на бистите длабоко го погоди Сојузот на борци од Битола. Оттаму се сеќаваат на случај пред една година кога бронзена биста на првоборец беше украдена, но подоцна се констатира дека причините биле економски.

„Невиден вандализам. Ова без сомнеж е дело на дрогата и алкохолот. Овде е манифестирано насилство и анархија. Паркот не е заштитен во текот на ноќта“, истакна Митко Недановски, секретар на претседателството на Сојузот на борците. Битолската организација на борците поднесе кривична пријава против непознат сторител и побара од граѓаните да помогнат во расчистување на случајот.

Од Јавното претпријатие „Комуналец“ се сомневаат дека иста група постојано дивее низ градското шеталиште, но никако да не може да се открие. „Уништувањето на урбаната опрема отсекогаш се случува, но ова што го гледаме сега е тежок вандализам. Уништени се кошници, клупи. Голем дел од урбаната опрема беше нова. Нашите екипи ќе ги санираат штетите, меѓутоа лузните од овој настан ќе останат“, изјави Јовко Крстевски, директор на битолски „Комуналец“.

Од Општината велат дека паркот е под стражарски надзор, но немаат одговор каде бил чуварот за време на вандалскиот чин. Откако го осудија настанот, кажаа дека штетата ќе ја санираат со општински пари. Градоначалникот Владимир Талески одамна најави камери на шеталиштето, но од реализацијата на плановите засега ништо.

„Имаме чувари што го надгледуваат тој дел, но, најверојатно, биле на другата страна, бидејќи го чуваат и Тумбе-кафе и Офицерски дом. Не ги поставивме камерите поради проблемот со нарушување на приватноста. Размислуваме како да го изведеме тоа“, вели Талески.

Полицијата излезе на самото место и констатира дека настанот се случил вчераутро, меѓу 1 и 5 часот. Но, засега нема ни трага ни глас од сторителите. „Со употреба на физичка сила бистите се турнати од постаментите и паднале во непосредна близина. Оштетувањата се направена на самите постаменти, додека кај бистите не се утврдени штети. Работиме на случајот“, изјави Ѓоко Стрезовски, портпарол на СВР - Битола. (А.Б.)