Насловна

Реакција од Министерството за култура на едиторијалот под наслов „Бизарни критериуми“ од авторот Тина Иванова

Почитувани,

Тенденциозни се, неосновани и крајно паушални тврдењата на новинарот Тина Иванова изнесени во едиторијалот насловен „Бизарни критериуми“, објавен во денешното издание на „Утрински весник“.

Не е бизарно, небулозно и невозможно еден актер, режисер, костимограф, сценограф, ликовен уметник и архитект, вокално-инструментален солист, диригент, композитор, писател, сценарист, кореограф и балетски уметник да е добитник на врвни државни награди, да учествувал на познати и признати меѓународни манифестации, да има реализирано најмалку 20 премиерни самостојни изложби или презентации, да има остварено најмалку 30 главни улоги, режии, сценографии, костимографии или, пак, неговите дела да се преведени на најмалку 10 странски јазици и слично.

Бизарно е, небулозно и невозможно што во својот коментар, Тина Иванова, која патем е уредник на Културна рубрика и познавач на културните прилики во земјава ги девалвира успесите и трудот на македонските уметници со тоа што тврди дека „такви луѓе во Македонија, кои би ги исполнувале предложените критериуми, не постојат“.

Потенцираме дека критериумите дадени во Законот, несомнено, се строги и треба да бидат строги, но се реални, мерливи, универзални и остварливи.

Почитувана г-ѓо Иванова,

Доколку и Вие имате некои конкретни и релевантни предлози во врска со Законот за национален уметник, можеме да ги разгледаме.

Спротивно на Вашите тврдења за отсуство на јавна дебата за овој Закон, Ве потсетуваме дека оваа иницијатива пред речиси две години беше вградена во Законот за остварување на културата, кој подолг период беше достапен на веб-локацијата на Министерството за култура.

Минатата среда во Собранието на РМ, на седницата на Комисијата за култура беа повикани 50-ина уметници од сите дејности од областа на културата, кои јавно дадоа свои конкретни мислења. Во Министерството за култура во изминатите неколку дена интензивно се работеше на вградување и доработување на сите предлози, а забелешките преку амандмани, Собранието на РМ ќе може да ги внесува во Законот.

Потсетуваме дека титулата национален уметник ќе се доделува во јасно пропишана постапка каде што нема простор за манипулации. Ваквата поставеност на критериумите, во целост ја исклучува можноста за дискреционо одлучување на субјектите инволвирани во постапката за доделување на титулата, избегнување на субјективизмот во одлучувањето, а особено можноста од влијание на политиката при донесување одлуки за избор на кандидат за доделување на титулата национален уметник.

Титулата ќе ја доделува претседателот на Република Македонија, врз основа на предлог од министерката за култура, а по претходно мислење на комисија, која е должна да утврди дали предлогот за национален уметник е во согласност со критериумите наведени во Законот. Иницијатива за доделување титула на национален уметник може да достават јавни установи од областа на културата, високообразовни и научни установи и здруженија на граѓани од областа на културата.

Убедени сме дека овие законски измени се во функција на валоризацијата на она што го постигнале уметниците досега, како и на нивниот придонес во промоцијата на македонските културни вредности во светот, бидејќи крајно време е да се престане со потценување и девалвирање на уметничкиот труд.

Министерството за култура во изминатиот период преку неколку конкретни мерки го подобри статусот на уметничкиот кадар кај нас. Се реализираа многу вработувања, се зголемија примањата на уметниците, сега ја воведуваме националната пензија, а со титулата национален уметник, како највисоко признание од областа на културата, ќе ги стимулираме и мотивираме сите македонски уметници да дадат врвен придонес во градењето и унапредувањето на културата и уметноста во нашата држава. Македонските уметници се најголеми амбасадори на македонската култура и, како и досега, и во иднина ќе останат наш врвен приоритет.

Почитувана Тина Иванова,

Законот за национален уметник е во интерес на уметниците, а особено е поттик за идните генерации да учествуваат и да се натпреваруваат на меѓународни фестивали и на други видни манифестации за постигнување што поголеми успеси на домашната и на меѓународната сцена.

Со почит,

Односи со јавноста