Црни оценки на „Фајненшел тајмс“ за Македонија

Лондон – „Блокадата на евроатлантските аспирации на Македонија поради наметнатиот спор околу името на државата може да ги влоши меѓуетничките односи во државата“, пишува лондонски „Фајненшел тајмс“.

Земјата која се' уште официјално е „поранешна југословенска република“ и од 2005 година има статус на земја-кандидат за Европската унија, според овој весник, изгледа растресена како никогаш досега по воените судирања во 2001 година..

„Интеграцијата на земјата во европските и во евроатлантските асоцијации, што беше главниот морков по судирањата од пред девет години за да се убедат етничките Албанци да го остават оружјето, веќе го загуби својот моментум. Грција и спорот за името што го има поведено прво ја блокира земјата да стане членка на НАТО, а потоа и го запре процесот за почнување на преговорите за полноправно членство во ЕУ“, забележува „Фајненшел тајмс“, кој им приговара на Унијата и на Брисел зошто во регионот на Западен Балкан целиот свој интерес го имаат насочено само кон случувањата во Босна и Херцеговина и во Косово.

Пред конференцијата во Сараево, на која се расправаше за иднината на целиот регион и за натамошното проширување, шпанското претседателство со ЕУ повеќе се занимаваше со тоа како да ги смести во иста просторија делегациите на Белград и на Приштина отколку за уште еден проблематичен случај, како што ја оквалификува весникот македонската меѓуетничка ситуација каде што блокадите на евроатлантските процеси го покренаа македонскиот национализам и ја зголемија фрустрацијата кај бројната албанска заедница.

Весникот ја пофалува македонската Влада и вели дека таа може да се смета себе си за проевропски настроена, затоа што Македонија е единствената од сите поранешни југословенски републики која ги има средено сите гранични прашања со своите соседи. Последна беше уредена и обележана границата со Косово, но „Фајненшел тајмс“ тврди дека во тој реон одново има проблеми, при што командантот Хоџа од судирањата во 2001 година и некогашен пратеник во македонскиот парламент Џезаир Шакири пак е со оружје в рака, инсистирајќи дека делот околу неговата куќа е „република Танушевци“ во која македонската полиција не смее да дојде.

Во разговор за лондонскиот весник, тој вели дека неговите луѓе пукале кон хеликоптер на македонск��та полиција, пред две недели и се пофалил со митралезот поставен пред селското училиште каде што била неговата „канцеларија“. (МИА)