Насловна

Изворната порака на Тито отиде во историјата

Буквите, кои биле изработени од стиропор, се доуништени при вадењето од ѕидот што почна да се санира во меѓувреме

Извадокот од говорот на Тито посветен на кобниот 26 јули 1963 година, кој некогаш се наоѓаше на источната фасада на Музејот на Град Скопје, дефинитивно, замина во минатото. Пораката „Скопје повторно ќе се изгради и ќе биде гордост и симбол на светската солидарност“ е уништена. Дотраеноста на материјалот од кој беа направени била главната причина буквите да бидат извадени уште во далечната 1998 година. Оттогаш на ѕидот останаа само трагите од лепилото на таблите од иверка. Но, и така Титовата порака можеше лесно да се прочита. Сепак, сега и од лепилото не ��стана ништо и секоја трага е избришана откако надлежните на Музејот почнаа со негово реновирање. Сега, тврдат одговорните, не постои опција како да ги оживеат буквите.

„Не постои механизам како истите букви да се вратат онаму каде што беа, оти, впрочем, пораката и не постои. Буквите беа изработени од стиропор што по толку време логично е дека е уништен. Значи, во случајов не е пресуден човечкиот фактор. Тоа што во последните години се читаше од ѕидот беа остатоци од лепилото. Сепак, како компензација, уште во 2003 година автентичниот текст со говорот на Тито е испишан на бронзена плоча што е поставена на видно место на влезот од музејската зграда“, вели Љубица Кондијанова, директорка на Музеј на Град Скопје.

Инаку, ѕидот на кој со децении стоеше дел од говорот на Јосип Броз Тито кажан само еден ден по земјотресот, беше реконструиран уште во декември минатата година. Тогашното раководство на Музејот најави дека пораката повторно ќе биде поставена на истото место. Сепак, тоа до ден-денес не се случи. Со тоа, се чини, е уништен и последниот симбол на новиот град што по кобното јулско утро во 1963 година повторно се роди како град на солидарноста и хуманоста. (Дс.Т.)