Претходен број

ЕДИТОРИЈАЛ

Кога министер брка министер

Александрија Стевковска

Скандал во Собранието. Министер избрка друг министер од собраниска комисија и тоа јавно пред сите пратеници-членови на комисијата и пред целата македонска јавност која го следеше директниoт пренос од седницата. Иако сите го видоа тоа, од Министерството за финансии демантираат дека се работело за бркање, туку за ситуација во која министерот Трајко Славески најљубезно му се заблагодарил на министерот за земјоделство, Ацо Спасеноски, за неговите излагања.

Наводната причина поради која било направено тоа, според реакцијата на Министерството за финансии, е тоа што опозициските пратеници го злоупотребиле присуството на министерот Спасеноски и наместо да дискутираат за амандманите, започнале расправа за други теми од областа на земјоделството, со што свесно ја блокирале расправата на Комисијата за финансирање и буџет во врска со амандманите.

Со оваа реакција министерот сака да не' убеди дека сите ние сме чуле и виделе погрешно и дека Славески и не бил толку груб како што прикажаа повеќето медиуми, како и дека тој единствено се грижел Спасенсоки да не биде злоупотребен, а тој да продолжи со работа. Но, в ред, дури и да не била толку груба постапката на „замолување“ на еден министер да напушти сала каде што се дискутира, како што напишавме, никој не може да негира дека вакво нешто досега се нема случено и дека не му личи на еден функционер во Владата на таков начин да постапува спрема свој колега. Зарем личи еден министер да се однесува толку своеволно, поради што се доби впечаток како тој да си ја донел од дома комисијата, па кога некој ќе ги прекрши неговите домашни правила на однесување да го избрка како непослушно дете?

И зошто Славески му ја покажал вратата на Спасеноски, а тоа не му го направил на министерот за транспорт и врски, Миле Јанакиески, кој исто така беше присутен и одговараше на амандманите што биле од неговиот сектор. Можеби тоа не го направил, бидејќи Јанакиески е близок соработник на премиерот Никола Груевски и знае дека ако нему му се замери, работата ќе биде голема, додека министерот Ацо Спасеноски ја нема великодушната закрила на првиот човек во Владата.

Можеби во сржата на целиот проблем лежи тргањето настрана на министерот за финансии од сите акции на Владата, вклучително и за прашањата поврзани со буџетот. Минатата недела, на пример, имавме ситуација кога на седницата за пратенички прашања, пратениците најголем дел од прашањата за буџетот им ги поставуваа на премиерот или на вицепремиерот Зоран Ставрес��и, наместо на министерот за финансии, кој е доносител и реализатор на буџетските активности. Ако не се истакна на собраниската седница, Славески ги дочека своите пет минути во собраниската Комисија за финансирање и буџет, која е и негова матична комисија и каде што тој има неприкосновена позиција, а до пред некој месец не можеше да се искаже поради неодржувањето на седниците на комисијата поради инсистирањето таа да се води на албански јазик.

Сепак, од досегашната активност на оваа комисија не би можело да се заклучи дека Славески е многу подготвен за пратеничките прашања, со оглед на фактот дека на општиот претрес на Предлог-буџетот за идната година, тој не умееше, не можеше или не сакаше да даде одговори. Класичен пример за тоа беше барањето на опозицијата, конечно, да се каже колку Владата троши на бескорисни реклами, одговор што токму министерот за финансии неколку пати го одбегнуваше. Имаше и многу други прашања, кои останаа неодговорени, бидејќи Владата решила дека толку пари треба да потроши за одделни ставки и никој и ништо не може да ја премисли, па ниту светската криза. Така, наместо во тие рамки да се почекаше и да се оформеше буџет со сите кризни предиспозиции, нашиот буџет содржи многу нерационални трошења и проекции кои се засноваат повеќе на фиктивни бројки.