Претходен број

Полицијата приведе 21 професор на Универзитетот во Загреб

Целта на акцијата е спречување корупција во високото образование, вкупната бројка на приведени е 95

ЗАГРЕБ - По повеќемесечна тајни подготовки, вчера изутрина започна акцијата „Индекс“, во рамките на која полицијата стигна до Сообраќајниот, Економскиот и Машинскиот факултет во Загреб. На информативен разговор беа приведени неколку професори, а според последните информации, полицијата ја повикала на разговор и претседателката на Комисијата за судир на интереси, Деша Мликотин-Томиќ.

„Точно е дека вчераутро започна акцијата под шифра „Индекс“ чија цел е спречување корупција во високообразовните установи“, потврди портпаролот на полициската управа, Крунослав Боровец за „Индекс“.

„Во акцијата се приведени 95 лица заради криминалистичка истрага, од кои 21 професор, тројца асистенти и четворица припадници на техничките служби. Другите се студенти и граѓани“, потврди на конференцијата за печатот, државниот обвинител Младен Баиќ, додавајќи дека до крајот на денот ќе бидат претресени стотина станови, кабинети, автомобили и деловен простор. Во рок од 48 часа ќе се знае и конечниот список на осомничени, беше потврдено на конференцијата.

Како што истакна Баиќ, акцијата започнала уште во почетокот на годинава, а пред еден месец е одредено како всушност ќе се одвива полициската акција. Баиќ потврди дека државните институции имале неколку доверливи лица во овој случај. Баиќ откри дека при приведувањето кај еден професор пронашле 21 индекс, покрај кои имало 21.000 евра. „Страшно беше да се слуша разговорот на двајца осомничени, во кој едниот го прашува другиот: А што е со сиромашниот? Одговорот од другата страна беше: Сиромашниот ќе мора да учи“, рече Баиќ. На новинарско прашање дали тоа значи дека на другите факултети нема корупција, со оглед на тоа што „Индекс“ се посвети на четири факултети, Баиќ одговори неодредено: „За четири факултети и една високообразовна институција имавме цврсти индикации врз чија основа ја започнавме акцијата“, истакна Баиќ.

„Ценовникот за испити бил од 400 до 2.000 евра, додека запишување се наплаќало 9.000 евра“, потврди началникот на полицијата, Маријан Бенко, додавајќи дека во акцијата во која биле претресувани станови и простории на факултетите биле ангажирани повеќе од 100 полицајци. Акцијата која започна околу 6,30 часот траеше повеќе часови. „Никој од приведените не даде отпор и никој не се наоѓа во бегство“, рече Бенко.

Сообраќајниот факултет цело утро се наоѓаше под полициска „блокада“, а во зградата и понатаму не може да се влезе без индекс. Слична е состојбата и на Економскиот факултет.

Деша Мликотин-Томиќ е под истрага на полицијата, а покрај тоа што е предавач на Економскиот факултет, таа е претседателка на собраниската Комисија за решавање на судир на интереси. Мликотин-Томиќ предава трговско право, Основи на трговското право, право на меѓународна трговија и европско пазарно право.

На конференцијата за новинарите Баиќ не потврди ниту го демантираше приведувањето на Мликотин-Томиќ. Тој не сакаше да открие ниту едно име кое се најде на удар на „Индекс“.

„Се надевам дека колегите професори ќе бидат ослободени од сомневање, но ако некој е виновен за корупција ќе мора да одговара“, изјави за „Индекс“ деканот на Економскиот факултет, Дарко Типуриќ, кој потврди дека полициските службеници спроведуваат надзор над професорите од факултетот поради сомневање за корупција. На директното прашање, Типуриќ не знаеше да одговори колку негови колеги се уапсени. „Ги немам тие податоци, бидејќи не сум полицаец“, рече деканот, додавајќи дека неговиот факултет ќе направи се' да го заштити својот углед, но ќе им даде пристап до сите негови податоци и документи релевантни за овој случај. (Индекс.хр)