Насловна

Реформите се едно, името е друго

Полскиот амбасадор порача реформите во Македонија да не се држат како заложници во спорот за името

Македонија треба да ги спроведе потребните реформи за започнување на преговорите за членство во ЕУ, и покрај тоа што не е решен спорот за името со Грција, затоа што на таков начин кога тој ќе се реши, ќе се скрати времето за нивно затворање и придружување кон Унијата, смета полскиот амбасадор Карл Бахура.

„Реформите што треба да се спроведат во областите, како што се правосудството, јавната администрација и други области, не треба да се чека да се реши оваа пречка, туку да ги спроведувате на колку што можете посоодветен начин, дури и пред да почнат преговорите. Кога ќе се реши прашањето со името и ќе почнат преговорите, времето за нивно завршување ќе биде пократко и тоа ќе биде подобро за вас. Сметам дека реформите не треба да се држат како заложници за проблемот со името“, рече Бахура појаснувајќи ја својата неодамнешна изјава дека доколку Македонија не може да влезе на една врата во ЕУ, да проба т��а да го направи преку прозорец.

Тој на претставувањето на приоритетите на Полска за време на претседателствувањето со ЕУ, повтори дека неговата земја смета оти не е прашање дали, туку кога Македонија ќе стане дел од ЕУ. Според него, подобро е тоа што поскоро да се случи.

Бахура појасни дека еден од приоритетите на полското претседавање со ЕУ е постигнување напредок во спроведувањето на стратегијата на ЕУ за проширувањето, односно, како што рече, да се промовира принципот за условеност и обврска на сите земји аспиранти и кандидати да ги исполнат потребните критериуми, а процесот на проширување да се разбере како фактор што ќе ја зајакне кохезијата на Унијата.

„Во рамки на фокусот на односите Западен Балкан Полска планира да го поддржи европските аспирации на овој регион. Западен Балкан е високо на агендата на нашите приоритети“, рече Бахура.

Приоритетите на своето претседавање со ЕУ, Полска меѓу другите ги гледа во засилување на развојот на Европа преку заеднички пазар, преземање активности за безбедност преку заедничката одбранбена политика, но и безбедност на храната. (МИА)