ВМРО-ДПМНЕ - партија на големи прослави

Некогашните икони на десницата не се дел од славеничката еуфорија

Александра М. Митевска

Во наредните педесетина дена, кога владејачката ВМРО-ДПМНЕ со бројни спектакли ќе го одбележува 20. роденден, повеќето личности по кои се препознаваше партијата во првата декада од формирањето нема да бидат дел од славеничката еуфорија. Доволно е да се спомне поранешниот премиер и прв лидер на ВМРО-ДПМНЕ, Љупчо Георгиевски, кој во 2004 година ја напушти партијата или Љубе Бошкоски, кој минатата година ја формираше ОМ...

Во славеничките редови можеби ќе се најде место за дел од ветераните кои се вратија во ВМРО-ДПМНЕ откако не успеаја да ги етаблираат новите партии што ги формираа, како Борис Змејковски или Доста Димовска... Но, првата редица на големиот народен митинг, најавен за 17 јуни, најверојатно, ќе биде резервирана за новите функционери, чие политичко експонирање, главно, почна со доаѓањето на Никола Груевски на кормилото на партијата.

Актуелното раководство на ВМРО-ДПМНЕ годинава реши да го прослави роденденот како никогаш досега и како никоја друга партија досега - со трибини, панел-дискусии, презентации на документи, интензивна комуникација со граѓаните... Од партијата велат дека вториот голем јубилеј, што ќе се одбележува под мотото „За татковината се работи, ВМРО-ДПМНЕ - партија на големи одлуки“, ќе биде настан што ќе ја обележи годината.

Филип Петровски, еден од лидерите на вмровската младина во деведесеттите години на минатиот век, пак, смета дека оваа постава на врвот на ВМРО-ДПМНЕ нема причина за толкаво славење, бидејќи ги напуштила изворните принципи на македонската десница.

„Направен е историски рез. Отстранети се сите основачи на партијата и насила се создава ново водство, во кое нема место за ниту еден од позначајните политички актери од деведесеттите години. Тоа е јасен показател дека целосно се сменети концептот и идеологијата на партијата и дека, аналогно на тоа, партијата треба да си го смени и името“, оценува Петровски.

Според него, владејачката партија ги користи колективните чувства за значењето на историското ВМРО за свои лукративни причини и за владеење со измама. „ВМРО е секаде само не во ДПМНЕ“, категоричен е Петровски.

Одбележувањето на јубилејот на ВМРО-ДПМНЕ почна со трибина во хотелот „Холидеј ин“, посветена на формирањето и на развојот на партијата. Мане Јаковлевски, како еден од основачите, посочи дека на вториот конгрес во 1995 година бил дефиниран новиот курс на партијата, со цел вистински и правилен развој на Македонија. „Патот до целта не беше лесен и брз, туку беше трнлив и макотрпен, но ВМРО-ДПМНЕ ги преживеа и надмина сите предизвици на времето“, рече тој.

Вчера во хотелот „Континентал“ имаше презентација на најзначајните акти за Македонија од осамостојувањето до денес, што ги усвоило Собранието, а што биле поднесени од пратеници од ВМРО-ДПМНЕ.

Петар Арсовски, експерт по политички комуникации, вели дека во светската демократска практика не се забележани вакви примери на колосеумски прослави на партиски родендени. „Партиските родендени вообичаено се прославуваат со членството. Но, овој пат, наместо интимна прослава, цела држава треба да доживува катарза и срцата на сите граѓани цели 50 дена треба да бијат заедно со срцето на ВМРО-ДПМНЕ“.

Арсовски објаснува дека оваа Влада по природа е популистичка и дека ја користи секоја можност да се идентификува со народот - и за Нова година, и за Илинден и за сите други празници. „Сепак, помалку им забележувам кога го прават тоа, на пример, за Нова година, отколку за роденденот на нивната партија“, нагласува тој и посочува дека треба да се бара вина и кај тивкото мнозинство граѓани кое не ги критикува таквите потези. „Кога власта би се соочила со поостра критика за популистичките политики, вели Арсовски, веројатно би го коригирала начинот на функционирање“.

Опозицијата реагираше на најавите за мегаломанска и маратонска прослава на годишнината на ВМРО-ДПМНЕ. Опозиционерите посочија дека такви манифестации се својствени само за тоталитарни режими и дека граѓаните ја плаќаат власта да им ги решава проблемите, а не да организира митинзи.