Заеднички простор, еден газда

Во зграда во Капиштец станар си ја присвоил заедничката просторија без согласност од соседите

Бојан Шашевски


Станарите од зградата број 13 на улицата „Народен фронт“ во Капиштец стравуваат од узурпирање на заедничкиот станбен простор откако новиот сосед започнал самоиницијативно да доградува една од просториите на катот што се користи како остава, а води до противпожарните скали. Ова е втор случај на узурпација, бидејќи претходно тоа веќе го сторил станар од погорните катови, па станарите се плашат ваквата појава да не стане практика.

Неразумниот сосед сега не само што си го присвојува заедничкиот простор на катот туку истовремено презема активности и за спојување на сопствениот стан со сигурносните скали и делот низ кој минува водоводната инсталација, но и каблите за струја за целата зграда.

„На овој начин се блокира и делот што служи за итни случаи, па некои станари што немаат директен пристап од сопствената тераса до сигурносните скали комплетно се отсечени и немаат алтернативен излез во случај на евентуален земјотрес или пожар“, велат тие.

Граѓаните сметаат дека сето ова е контрадикторно со Законот за домување, кој предвидува постоење заеднички ходници, скали, тавани, пералници, сушилници, подруми, засолништа, простории за домарска служба, за куќен совет и слично, поточно, на простории што и' служат на населената зграда како целина. Но, и покрај тоа, незадоволните станари од „Народен фронт“ број 13 се плашат дека узурпирањето на заедничката станбена квадратура ќе продолжи да се практикува и во наредниот период.

„Освен што со години не се плаќа за лифтови и за чистачки, сега некои од станарите си земаат за право незаконски да ги прошируваат домовите. Погледнете наоколу низ населбата. По сопствен избор се менуваат фасадите на зградите, се доградуваат и прошируваат терасите и покривите, а со тоа постојано се видоизменува и губи препознатливоста на самата населба“, велат загрижените станари, тврдејќи дека воопшто немаат услови за договарање, бидејќи не постои ни куќен совет на зградата. „Секој си прави што ќе му падне на памет, без дозвола и меѓусебен договор“, додаваат тие.

Од Градежната инспекција на Општина Центар ни беше речено дека кај нив се' уште не стигнала официјална пријава за случајот, но потенцираат дека узурпирањето и доградувањето на простор од ваков тип е законски недозволиво. Ветија дека случајот дополнително ќе го проверат.