ЛИЧНОСТ
Хилари Клинтон
Пред неполна година вредни статистичари пресметуваа дека еветуалното враќање на Хилари Клинтон во Белата куќа ќе значи меѓу 24 и 28 години непрекината власт на Бушови и Клинтонови на чело на најстарата демократија.
Хилари не стана претседател, но улогата на државен секретар ја става во улога на прва меѓу еднаквите во „дрим тимот“ на Барак Обама. Некогашната американска прва дама го доби Стејт департментот кое е најмоќното место во американската администрација.
Хилари Клинтон(61) е трета жена на оваа позиција по Медлин Олбрајт, државен секретар во Клинтоново време, и Кондолиза Рајс во администрацијата на Буш. Нема сомневање дека сенаторката од Њујорк, која се покажа како жесток противник на Барак Обама во демократската трка за претседателски кандидат е можеби најдобриот избор на Обама, а нејзиното искуство ќе биде значајно во престројувањето на американската надворешна политика кое го најавува новиот претседател.
Правник по професија, со диплома од Универзитетот „Јеил“, со блескава кариера и одлични приходи, Хилари никогаш не беше само сенка на претседателот, а се покажа дури и позрела и поцврста од сопругот Бил кога пукна неговата неславна афера со Моника Левински. (Д.Ч.) |
