Уште еден студен туш за македонскиот раст

Додека македонската Влада упорно стои на ставот дека домашната економија годинава ќе порасне за 4,5 отсто, од светските институции и истражувачки центри постојано стигнуваат песимистички прогнози. „Економист интелиџенс јунит“ ни прогнозира раст од 1,5 отсто

Додека македонската Влада упорно стои на ставот дека домашната економија годинава ќе порасне за 4,5 отсто, од светските институции и истражувачки центри постојано стигнуваат песимистички прогнози. Најнова е онаа на „Економист интелиџенс јунит“, специјално одделение на угледниот „Економист“, чии процени се дека оваа година македонскиот бруто-домашен производ ќе има раст од само 1,5 процент.

Тоа е три пати помалку од она што го предвидуваат домашните власти. Ова е коригирана прогноза на „Економист интелиџенс јунит“ за земјава, откако претходно очекувале дека нашиот раст годинава ќе оствари позитива од 2,2 проценти.

„Економист интелиџенс јунит“ е исклучително реномирано специјално одделение на „Економист“, кое се занимава со истражувања за економските и политичките движења и ризици за сите држави во светот, а неговите прогнози се сметаат за сериозни и многу влијателни.

Во нивната анализа се наведени и оценки за сите видови ризици во Македонија, при што оценката ААА се дава за најмалку ризик, додека Д е оценка резервирана за најголем ризик. Притоа, за суверениот ризик на Македонија се смета дека ја заслужува оценката Б. Истата оценка е дадена и за валутниот ризик, како и за ризикот на банкарскиот сектор. Многу полоша оценка, односно ЦЦЦ, добиле политичкиот ризик, како и ризикот за економската структура. Ризикот на земјата е оценет со Б.

Намалувањето на прогнозата на „Економист интелиџенс јунит“ е последица на проблемите со кои се соочува еврозоната и опасноста од рецесија.

Во анализата се прави осврт и на најавата на Владата за пакет од 50 мерки кои би ја подобриле деловната клима. „Иако мерките ќе ги подобрат техничките аспекти на оперативното милје за бизнисот во Македонија, малку е веројатно дека тие ќе се справат со поструктурните проблеми. Тие, пак, ги вклучуваат неефикасната правна рамка која не овозможува ефикасна заштита за сопственичките права, корупцијата, како и политичкото мешање, кое често се забележува во административниот и судскиот систем“, се наведува во истражувањето.

Оваа прогноза на „Економист интелиџенс јунит“ следува откако меѓународните финансиски институции од поодамна предупредија на забавување на македонската економија. Прво Светска банка излезе со проекција за раст од 2,5 отсто, а уште поосвестувачка беше онаа на Меѓународниот монетарен фонд, кој очекува годинава нашиот БДП да порасне за два отсто. Европската банка за обнова и развој, пак, за земјава очекува позитива од 1,8 проценти. Најновата прогноза на „Економист интелиџенс јунит“ од 1,5 отсто е најниска во моментов.

Но, не е исклучено и другите светски институции пак да ги ревидираат надолу своите прогнози за Македонија.

На домашен терен, пак, минатата недела ситуацијата ја разбранува Народна банка на Македонија, чии прв човек, гувернерот Димитар Богов, соопшти дека монетарната власт за годинава очекува раст од 2,4 отсто, што е безмалку двојно пониска проекција од онаа на Владата.

Но, тоа не беше причина Владата да ги смени своите оптимистички очекувања. Неколку дена по настапот на Богов, премиерот Никола Груевски изјави дека за евентуална корекција ќе се размислува дури откако ќе се следи состојбата најмалку еден квартал. (Н.Н.Ф.)