Со бор машина против евроинтеграцијата

На конференцијата на СДСМ гостите не се слушаа, бидејќи баш за време на настанот и околу салата се работеше интензивно и дупчеше бор машина

Во Македонија има расчекор меѓу декларативните заложби за евроинтеграција и реалната политика која оди во сосема друг правец, тврдеше лидерот на СДСМ, Бранко Црвеновски, на Меѓународната конференција „Проширувањето на ЕУ: пат со постојани пречки?“ Според него, таквите антиреформски политики камуфлирани во проевропска реторика предизвикуваат сомнеж и разочараност кај граѓаните во самата европска идеја.

Црвенковски смета, исто така, дека со искрена политичка волја од Македонија и од Грција може да се реши спорот за името, но дека таа во изминатиот период видливо недостасува. На конференцијата учествуваа и известувачите на ЕП за Македонија, Ричард Ховит, и за визната либерализација, Тања Фајон. Фовит, сепак, не се појави на прес-конференцијата, според него бидејќи станува збор за собир на претставници на социјалистичките партии, а тој не е тоа, туку известувач, а според наши извори, бидејќи не сакал да му се повтори искуството на Зоран Талер, кој беше обвинет за пристрасност и беше во „политичка војна“ со власта во Македонија.

Европарламентарците притоа видоа од прва рака каква е слободата на изразување во Македонија откако од почетокот, па до крајот на конференцијата мораа да надгласаат бор машина, бидејќи некој во висококатегоризираниот „Александар палас“ баш во сабота, и баш во тој термин решил нешто да реконструира. Иако одговорните во хотелот беа предупредени дека работите пречат, тие не престанаа до крајот на прес-конференцијата, па во таа неверојатна бучава гостите не се слушаа, а Јан Виерсма ја оцени ситуацијата и како необјаснива.

Тања Фајон, сепак, ги подвлече заложбите на групата на социјалдемократи во ЕП за продолжување на процесот на проширување на ЕУ и за интеграцијата на Западен Балкан.

„Во ЕП сме голем поддржувач на процесот на проширување и се обидуваме моментно, исто така, да извршиме притисок врз нашите европски влади да сторат се' да се отворат преговорите со Македонија. Мислам дека ова е многу важно и покрај неразрешеното прашање за името со Грција затоа што многу добро знаете дека веќе имаме јасни препораки од ЕК“, рече Фајон. Taa во пресрет на состанокот на Европскиот совет за внатрешни работи и за правда кој ќе расправа за визната либерализација попладнево имаше средба со вицепремиерката за европски прашања Теута Арифи.

Бугарскиот европратеник Кристијан Вигенин, пак, како лански известувач за Македонија, оцени дека верува во европската иднина на земјата и дека таа е единствениот начин да се обезбеди просперитет, стабилност и мир во регионот и целосно почитување на човековите права во земјата и пошироко, што е едно од прашањата кое според него загрижува.

Генерално, беше упатена порака дека за Македонија, но и за другите земји од регионот нема алтернатива за членство во ЕУ и дека меѓународното право и пресудата од Хаг мора да се почитуваат од земјите-членки на Унијата. (С.Ј.)