26.08.2013, 15:32 Обвинителството ја одби гаранцијата за Кежаровски
Понудената гаранција за новинарот е единствената одбиена гаранција, додека за другите пет се' уште нема судско решение
Љубиша Станковиќ
Понудените гаранции за новинарот Томислав Кежаровски, кому пред само три дена му беше продолжен п��итворот за нови 30 дена, се одбиени со обрзложение дека за него не се исполнети законските услови со кои се овозможува замена на притворот за некоја друга мерка.
Одбивањето на понудените гаранции за новинарот Кежаровски е единствената одлука која е донесена, а за понудите на другите обвинети во случајот наречен „Ликвидација“ се' уште не е решавано.
„Понудени се предлози за укинување на притвор во замена за понудени гаранции за шестмина обвинети, но решено е само за еден од нив со тоа што понуденото е одбиено“, велат од скопскиот кривичен суд и потврдуваат дека за некои од обвинетите се' уште се чека на мислењето на Јавното обвинителство.
Како што веќе пишувавме за Кежаровски, кратко време по неговото притворање, како гаранција беше понуден градежен плац чија вредност, од регистриран проценител, е проценета во 20.000 евра. До кривичниот суд, неодмна, беше доставена истата понуда, но таа по втор пат е одбиена.
Каква одлука може да се очекува за преостанатите петмина обвинети ќе се знае наскоро. Доколку Јавното обвинителство за гонење на организиран криминал и корупција ги прифати понудените гаранции, тогаш е реално да се очекува веќе на првото наредно рочиште да има и такви кои на судење ќе доаѓаат од сопствените домови, но со полициска придружба. За да дојде до укинување на мерката притвор за некој од преостанатите петмина обвинти кои понудиле гаранции не е доволен само висок износ на понуденото, туку треба да бидат исполнети и одредени законски услови.
За предлозите за замена на притворот со понудени гаранции прв, во судница, проговори бранителот на обвинетиот Сашко Лазаров. Тој, на главен претрес, го информираше судот дека пред точно еден месец понудил недвижен имот во висина од 36,9 милиони денари или 600.000 евра, а за возврат се бара изрекување на алтернативна мерка или можност да се брани од слобода.
Колкави износи понудиле другите обвинети во случајот „Ликвидавија“ не се соопштува, но се претпоставува дека станува збор за големи износи, бидејќи само во случајот на последнообвинетиот Јане Павловски, според тврдењето на негови блиски роднини, како гаранција биле понудени две куќи вредни 300.000 евра, а дека за него биле активирани и други гаранции кои што биле дадени во некои други кривични постапки.
Во случајот „Ликвидација“ беа активни судии и пензионирани судии, обвинител и адвокати, како и новинарот Кежаровски поради текст објавен пред пет години со кој наводно го открил идентитето на заштитениот сведок за убиството во Ореше. На првото судско рочиште сите обвинети го негираа обвинението и изнесоа сосема поинакви тврдења од оние кое се во обвинителниот акт.
|
