ФОТО: Наградата „Мајка Тереза“ за Мукаетов и Поповски



Одборот за доделување на државната награда „Мајка Тереза“, на денешната свеченост во „Порта Македонија“ ги врачи признанијата на годинешните добитници: Живко Поповски-Цветин, сликар, хуманист и новинар и Живко Мукаетов, генерален директор и претседател на Управниот одбор на „Алкалоид“ АД Скопје. Оваа награда, традиционално, секоја година се доделува за особено значајни остварувања од ��нтерес на државата во областа на хуманоста и човековата солидарност.

Претседателот на одборот „Мајка Тереза“, академик Витомир Митевски, истакна дека при изборот на овогодишните добитници, најмногу внимание посветиле на тоа кои од кандидатите вистински би ја продолжиле хуманата мисија на Мајка Тереза.

Добитниците на наградата истакнаа дека овој чин за нив претставува огромна чест, но и поттик за нови хумани дела. „Оваа висока државна награда претставува чест, задоволство, но и поттик за наши понатамошни активности кои би биле во знакот на вредностите коишто особено се ценат кај луѓето, а тоа се хуманоста, човековата солидарност, меѓусебното разбирање, а во исто време и почитување на различностите кај луѓето. Тоа се вредности во кои јас сум бил воспитуван и кои се трудам да ги пренесам на моите деца. Помагањето на луѓето на кои им е потребна помош нема да осиромаши никого. Напротив, ќе не' направи побогати за едно убаво искуство, а тоа е сознанието дека сме направиле добро дело“, изјави Мукаетов, кој во негово и во име на Живко Поповски-Цветин им се заблагодари за наградата. Мукаетов истакна дека паричниот надомест кој му следува како добитник на оваа државна награда, во износ од пет просечни месечни плати во Македонија, ќе го донира за набавка на работни материјали во Заводот за рехабилитација на деца и младинци „Св. Климент Охридски“ од Скопје.