26.08.2013, 15:34 Дигитализацијата ги стави во мрак Македонците околу
Македонците од Албанија апелираат до надлежните институции во Македонија да најдат решение и натаму да го примаат сигналот на МТВ и, како и до пред дигитализацата, да можат да ја следат програмата која, како што велат, има голема улога во зачувување на македонскиот идентитет меѓу Македонците во Албанија и Грција.
Васил Стерјовски, македонски активист во Албанија, вели дека по исклучувањето на аналогниот сигнал на МТВ има реакции од Македонците во Албанија и во Грција, кои бараат колку што е можно поитно да се најде решение за овој проблем.
„ Ние со програмите на МТВ сме израснати, со Бушавата Азбука, народните приказни, Тврдокорни, разните документарни емисии и македонските песни со кои се одржувал македонскиот дух меѓу Македонците во Албанија. До сега, во Албанија, во областите каде што живее македонско население, сигналот на МТВ можеше да се фати со обична антена во областите Мала Преспа, Голо Брдо, во с.Врбник, но и во градовите Корча, Поградец и Билишта. Исто така, сигналот на МТВ зрачеше и во Егејска Македонија, во градот Лерин и во селата во Леринска околија“, објасни Стерјовски.
Според него, решение би било надлежните институции во Македонија да дозволат МТВ да не ги исклучува репертиторите поставени во близина на границата со Албанија и Грција и да продолжи да се емитува аналогниот сигнал на МТВ, затоа што ова е од национален интерес за Македонците во Грција и Албанија за зачувување на јазикот, културата, фолклорот и македонскиот идентитет.Стерјовски додава дека Македонците во двете соседни земји немаат право на македонски програми на националните телевизии во овие земји и се наоѓаат под притисок на асмилиција. Уште во времето на комунизмот кога беше забрането гледање македонска телевизија, Македонците во Албанија ја гледаа тогашна телевизија Скопје, поради што голем број Македонци биле казнувани и затворени.
|
