Ослободителна пресуда за членовите на „Плоштад слобода“

Одделот за прекршоци не нашол одговорност кај 16-мина за инцидентот на скопскиот плоштад

Љубиша Станковиќ

Одделот за прекршоци при скопскиот Кривичен суд ги ослободи од виновност 16 припадници на здружението „Плоштад слобода“, кои беа обвинети за нарушување на јавниот ред и мир при протестите за изградбата на црква, кои се случија на 28 март минатата година на скопскиот плоштад.

Судот не нашол докази со кои ќе се потврдеше пријавата на МВР дека членовите на „Плоштад слобода“ го прекршиле законот. Во анализата на судијата што ја изрече ослободителната пресуда е наведено дека од исказите на обвинетите, како и од видеоматеријалите што биле презентирани, не се утврдило дека е нарушен јавниот ред и мир. Судот констатира дека членовите на „Плоштад слобода“ учествувале во уредно пријавениот протест што го организирале членовите на „Прва архи-бригада“. Тие во критичниот ден со транспаренти се движеле кон централниот скопски плоштад. Движењето на групата било во форма на квадрат, а тоа требало да заврши на местото на кое што државата планира да изгради црква. Но, кога виделе дека во пресрет им доаѓа група што била непријателски настроена, тие одлучиле да го избегнат соочувањето со нив.

Станувало збор за група што носела верски ознаки и транспаренти за поддршка на планот за изградба на црква на плоштадот „Македонија“.

Судот не успеал да утврди кој ги нападнал членовите на здружението „Плоштад слобода“, но констатира дека тие ниту провоцирале ниту се тепале со поддржувачите на изградбата на црква.

Кон крајот на јануари оваа година, истиот скопски суд донесе пресуда со која од виновност ги ослободи и членовите на здружението „Архи-бригада“ за кои МВР, исто така, поднесе прекршочна пријава. Со оваа првична пресуда беше утврдено дека токму „Архи-бригадата“ била таа што планирала и пријавила мирен протест на плоштадот „Македонија“, но дека оние што атакуваа на нив и на членовите на „Плоштад слобода“, немале најавено никаков собир на истото место.