Поглед

Водно го враќа ударот

Димитар Чулев

На крајот ќе се испостави дека и не бил виц наводниот оглас „Продавам куќа на клизиште, со тенденција за шест месеци да биде во строг центар. Цена променлива“.

Паѓањето на потпорниот ѕид на улицата „Салвадор Алјенде“ во елитниот кварт на Водно е сериозно предупредување. Експерти велат дека не може туку така да се влезе во „недрата“ на Водно, да се отсече парче земја како „резне од лубеница“ и да се очекува дека со потпорен ѕид Планината ќе биде задржана да не реагира. Колкав и каков да е тој.

Настрана прашањето дали некој и воопшто направил сериозна анализа дали механиката на теренот на Водно кое, патем речено, е во зоната на трустното скопско подрачје, може да издржи станбени мегаструктури од типот на оние кои се градат таму. Дали е можно да се порамнува теренот таму каде природата замислила косина...

Дали со лаички зафати е можно Планината да се претвори во модерни скалести „Самирамидини градини“ во кои наместо цвеќиња, ќе виреат тешки четирикатници надвиснати над стотонски базени со поглед на Градот долу?

Во трката по профит и под закрилата на градежното мото „повисоко, поелитно, поскапо“, на локации над некогашното „олимписко село“ никнува нов град, а инвеститорите и најмените „градежници“ го изгубија контактот со реалноста и заборавија на ноторната вистина дека „природата секогаш го возвраќа ударот“: во скопскиот случај преку ектремни температури, запирање на ветровите, ерозија на земјиштето.

Водно секогаш ќе тежнее да ја врати првобитната „линија“ и да ги збрише отсечените парчиња во подножјето каде некогаш имаше една „Панорама“ и едно олимписко село.