Магла за Филип Гордон

Пречекот на гостинот од САД беше дипломатски гаф

Слободанка Јовановска

Хармонизирање на односите меѓу земјите во Југоисточна Европа била темата поради која премиерот Никола Груевски место да се сретне со американскиот помошник државен секретар, Филип Гордон, слета во Загреб на неформална лидерска средба со Јадранка Косор. Тој, сепак, не беше единствениот кој имаше поважна работа во четвртокот од тоа да се сретне со гостинот од САД, кој престојуваше во прва официјална посета на Македонија. Каков „облак“ го спречи министерот Антонио Милошоски да дојде во Скопје, и каде исчезна по престојот во Стразбур, не кажува никој од МНР и од Владата.

Како и да е, од американски извори вчера се минимизираше дипломатскиот гаф на македонските функционери, кои очигледно го разбраа гестот на премиерот, но повеќе сакаа да му ја пренесат пораката отколку да долеваат страсти. Во Загреб, конечно, дошло до средба, на која според Гуевски, немало конкретни сугестии, но имало длабинска анализа.

„Ги кажавме нашите заложби за поскоро зачленување во ЕУ и во НАТО и дека силно сме фокусирани побрзо да се најде решение за проблемот со името. Волјата е огромна, но треба да добиеме предлог што го очекуваме подолг период, кој ќе содејствува на реалноста и ќе биде прифатлив за двете земји, односно и за поширокото граѓанство со оглед на тоа што ние се имаме обврзано да излеземе на референдум“, изјави Груевски.

Своите пораки, пак, Гордон во голема мера ги изнесе за време на посетата во Скопје. Последното предупредување го даде за телевизијата Алсат, оценувајќи дека ако Македони��а ја пропушти и оваа година за евроинтеграцијата, процесот може да се развлече дваесетина години.

„Не е до нас да излегуваме со конкретни планови или со датуми и да им кажуваме на двете страни што мораат да направат. За нас, датумот за постигнување решение е јасен: колку што е можно побргу. Датумот е вчерашниот! Мислиме дека проблемот предолго се развлече. Страните мора да дојдат до договор, во интерес на двете земји е да го направат тоа.

Со секоја недела или месец што ќе помине без решение, губиме важно време. Го губиме фактот дека имаме новоизбрана грчка влада со силен мандат да дејствува, па ако чекате предолго, условите може да се променат. Во јуни е состанокот на Советот на ЕУ кој одлучува за кандидатскиот статус за Македонија. Ако спорот се реши пред тоа, можете да продолжите со интеграциите со кои, инаку, не би можеле. Ако спорот може да се реши наскоро, Македонија ќе ја оствари целта да се придружи кон останатите лидери на НАТО на самитот во Лисабон во ноември. Замислете, тоа би бил вистински триумф за оваа земја. Но, ако ја пропуштите таа можност, можеби целата работа ќе потрае уште нови 19-20 години“, изјави Гордон во интервјуто.

На прашањето дали гледа доволно активности во правец на барање решение кај двете земји, Гордон одговори дека верува оти е така.

„Мислам дека и двете влади се сериозни во движењето во таа насока. Многу посериозно од тоа што се правело во минатото. Не е лесно. Да беше лесно, проблемот одамна ќе се решеше. Имаме новоизбрана влада во Грција, која мислам дека сака проблемот да го остави зад себе и да оди кон регионална соработка. Мислам дека и македонското раководство разбира колку е важно да се реши проблемот. Правиме се' што е во наша моќ да го помогнеме процесот. Не сакам да претерувам, знам колку е тежок проблемот на двете страни, но мислам дека има нова динамика што треба да се искористи“, оцени Гордон. За отсуството на премиерот, Гордон ги прифа��и објаснувањата на кабинетот на Груевски дека облакот го спречил да дојде навреме во Скопје. „Јас секако ќе одев дома низ Загреб, а тој ќе одеше за Загреб. Изгледа дека логистиката барем еднаш беше во наша корист“, изјави Гордон. Од Владата вчера никој не реагираше на медиумските тврдења дека првпат Груевски не доцнеше, туку глумеше доцнење, за да избегне непријатна средба. (С.Ј.)