Поглед

Скриен список

Катица Чангова

Сите се чудат каква е оваа (бе)смислена криенка со Избирачкиот список. Власта е молчалива и избегнува да открие дали има некакви дефекти во регистарот на гласачи. Треба ли да се испратат инспектори на терен за да ги разбуричкаат податоците и да ја завршат работата како што го прават тоа кога влегуваат во фирми и изрекуваат апсурдни казни?

Чувањето информации зад девет катанци произведува лоши последици. Списокот за избори и какви тајни крие само ја разгоре љубопитноста и непотребно ја издраматизира ситуацијата. Излегува дека сознанијата од проветрувањето на евиденциите со избирачи се најстрого чуваната тајна.

Прозивка за нетранспарентност на владејачката гарнитура околу акцијата со списокот која трае половина година сосема очекувано дојде од институции, партии, невладини, амбасади. Државната изборна комисија е хендикепирана, бидејќи нема водечка улога за ова прашање. Тефтерите и натаму се неприкосновена „сопственост“ на ресорите за полиција и за правда. Токму затоа опозициските партии инсистираат на набљудувачки статус во ревизијата, а граѓанскиот сектор се залага за достапни податоци и за поголема доверба. Побрзи и порешителни чекори во постигнувањето високи стандарди за гласање бараат и меѓународните претставници.

Во списокот немало којзнае какви фрапантни отстапувања. Но, оние што се обидуваат да ги пребројат живите, умрените и иселените се врзале во јазол. Затекнале несредени и хаотични бази со податоци кои се создадени со погрешен начин на администрирање. Не постои централен регистар на граѓани, комплетно портфолио со матичен број, адреса на живеење... Којзнае дали со ваква системска слабост некогаш ќе имаме реален список.