ГОСТИВАР - Чувањето златен накит, девизи и денари во домовите станува се' понебезбедно и е вистински магнет за крадците. За само петнаесетина дена, во три куќи во три гостиварски села беше украден златен накит, девизи и денари во вкупна вредност од над 30.000 евра.
Четириесет и осумгодишната С.Х. од гостиварското село Долна Бањица, која живее сама во домот, завчера пријавила кражба на 16 парчиња вреден златен накит. Како што изјавила во полициската станица во Гостивар, крадците го искористиле нејзиното невнимание и влегле во куќата и ја извршиле кражбата.
Цел на крадците била и куќата на С.Р. во гостиварското село Градец од каде што пред три дена непоканетите „гости“ украле златен накит во вредност од околу 10.000 евра, 2.000 евра и 10.000 денари. Од куќата на А.И. во гостиварското село Лакавица, на 10 мај, непознати лица влегле во неговата куќа и му украле златен накит во вредност од околу 10.000 евра.
Поради зачестените кражби на златен накит од домовите, полициските инспектори апелираат до граѓаните, големите количини златен накит, девизи, денари и други вредни предмети да ги чуваат во банки или подобро да ги заштитат и да ги скријат во домовите. Исто така, кога ги напуштаат куќите или становите, да ги затвораат прозорците и вратите. Во сите три кражби сопствениците на куќите им овозможиле крадците да влезат во нивните куќи низ отворен прозор или врата. (К.К.)
