Грција и' се заканува на Грузија со „македонско вето“

Грузија не' откачи за признавањето под уставно име. Според грчкиот весник „Елефтеротипија“, по интензивни тајни дипломатски средби, Грузија ја ставила одлуката за признавање на Македонија под уставното име на стенд-бај.

Вештерката во приказната, секако, е Грција, од каде што според „Елефтеротипија“, била испратена порака дека доколку Грузија планира да ја признае Македонија, Атина ќе „крене рампа“ на амбициите на Тбилиси за влез во НАТО и за финансиската помош што ја добива оваа земја преку европските фондови.

Според весникот, Грузија под раководство на Вашингтон во последниот период била во процес на признавање на Македонија под уставното име „Република Македонија“. Главен лобист во Вашингтон за ова прашање, наводно, е Ренди Шунман, советник за надворешна политика за време на изборната кампања на тогашниот кандидат за претседател, сенаторот Џон Меккејн, кој во последните пет години, наводно, работи на разговорите меѓу Македонија и Грузија.

Случајот со Грузија, според пишувањето на весникот, треба да се сфати како предупредување за притисокот на САД врз Атина, особено доколку нема напредок во преговорите за името. „Чудно е како овој отстрана изрежиран чекор на Грузија се совпаѓа со други „конфликтни“, нејасни пораки од САД, преку кои се забележува внимателен став кон проблемот со Скопје, но истовремено се избегнува користење на терминот „Македонија“. Ова може да се види како двојна игра на Вашингтон, каде што политичкото раководство и бирократијата говорат две различни работи“, пишува „Елефтеротипија“.

Дипломатски извори од Македонија потврдуваат дека од поодамна се воделе преговори со Тбилиси за признавање под уставното име, но дека оваа држава без политичка тежина за нас, се вадела на можноста да добие грчка рампа во НАТО, откако во Букурешт се протна со најава за покана, како втора контроверзна точка покрај Македонија. Грузија, исто како и Македонија е на врвот според бројот на војници во НАТО-мисиите во однос на жителите на земјата, но тоа не и' помогна којзнае колку во статусот, поради противењата на Русија. Покрај Грузија, Јапонија и Јужна Кореја се останатите држави од азискиот регион кои даваат отпор за признавање на нашата држава под уставното име. (М.П.)