Петровски: Никој не им верува на лустраторите

Оливера Војновска

Дворската лустрација што ги засени сите настани во државата, веројатно, уште долго ќе ја бранува македонската јавност. Тоа што Комисијата за лустрација одлучи да не ги лустрира функционерите на ДУИ, потпирајќи се на одговорот на институциите дека досиејата се плагијат, нема да ја исчисти и дамката од нивните лични и професионални биографии. Напротив, прогнозите се дека „Ибар“, „Вујко“, „Мама“ и „Стрелец“ (независно што не е предмет на лустрација) ќе остават длабоки лузни не само кај лицата што јавноста ги препозна во спомнатите псевдоними, туку сериозно ќе го разниша угледот на ДУИ.

„Никој во државава не верува во одлуката на лустраторите. Прилично индикативно е како се однесува Комисијата од самиот почеток на лустрацијата. Впечаток е дека нејзината улога не е да ги открие, туку да ги заштити кодошите. Многу е смешно тоа што процесот во Македонија се сведе на еден-двајца кодоши “, смета поранешниот функционер на ВМРО-ДПМНЕ, Филип Петровски, за кого безбедносните служби кон крајот на 90-тите години од минатиот век водеа досие под псевдоним „Марта“.

Но, има суштинска разлика меѓу неговото досие и кодошките досиеја битни за лустрацијата. Единствена сличност е во полицискиот речник со кој се напишани. „Јас бев следено, поткажувано лице поради моето студентско - политичко дејствување. Многу непријатно се чувствував кога прв пат го видов досието ’Марта‘, правено во периодот од февруари 1997 година до ноември 1998 година. Документите што беа објавени во медиумите се записи на луѓе што кодошеле. Тоа е огромна разлика“, ни раскажува Петровски.

Оградувајќи се дека не е докрај компетентен, тој вели дека досиејата, според начинот и структурата, му личат на веродостојни. „Мислам дека тие се валидни, во прашање се фотокопии на оригиналот. Немам дилеми во однос на содржинскиот дел. Тоа што институциите се обидуваат преку игра на зборови да се држат до формата на документите, е друга работа. Веројатно мислат дека така ќе го затворат прашањето. Но, се лажат, ќе остане горчливиот вкус од досиејата“, вели Петровски.

За него се фрапантни податоците изнесени во „Ибар“, тие фрлаат поинаква светлина на воениот конфликт во 2001 година. „Доколку се точни наводите дека формирањето и раководењето на штабот на Оружената војска на Косово (ОВК) било во организација и под директна команда на српските тајни служби, а на чии списоци биле и познати команданти на ОНА, значи дека војната во Македонија била диригирана од странски интереси. А знаеме дека директна последица на конфликтот беше промената на Уставот, по што се случи целосно редефинирање на системот. За ова треба да има воена истрага, што може да ја прави независна мешовита комисија“, смета Петровски. (О.В.)