ДУИ: Досиејата се напад врз сите Албанци

ТЕТОВО - „Ова не е само напад врз ДУИ, туку и врз политичкиот и општествениот идентитет и интегритет на Албанците во Македонија“, заклучило Централното претседателство на ДУИ, на завчерашната седница, на која се разгледувале состојбите околу лустрацијата.

Според потпретседателката на ДУИ, Теута Арифи, наводните досиеја за функционери на ДУИ се лиферувале на начин што е многу опасен, особено ако се има предвид дека приоритет на политичкиот ангажман во земјата треба да бидат евроатлантските интеграции. „Ова се прави од центри што не и' мислат добро на Македонија“, истакна таа.

Во ДУИ сметаат дека фалсификатори на досиеја ги напаѓаат претседателот и членови на претседателството на партијата, со што се влијае и врз стабилноста во Македонија и во регионот.

„Една од опциите е кривично гонење на оние што шират невистини. Овие напади не се приватна или лична работа, туку треба пошироко да се третираат. Затоа посветивме многу внимание и ги разгледуваме сите опции за официјално дејствување на нашата партија“, рече Арифи.

Таа најави посебна седница на Централното претседателство за пописот. „Ќе ги следиме сите реакции и врз основа на тоа ќе заземеме став и ќе градиме политички одговор. За нас е битно пописот да биде в ред, да нема поплаки и да биде прифатен од сите граѓани. Веќе разгледуваме одредени појави. Не е в ред да се прават паралелни пописи, кога тој процес официјално се одвива во државата“, објасни Арифи. (Г. Е.)