Тивок пуч во МРТ или законска смена на Управниот одбор?

Членови на Управниот одбор на Македонската радиотелевизија обвинуваат дека насила сакаат да им го прекинат мандатот и да ги заменат со нови кадри

Гордана Дувњак

Се случува ли тивок пуч во јавниот радиодифузен сервис, или пак, станува збор за легална законска смена иницирана од новиот Совет на МРТ за групно разрешување на постојниот седумчлен Управен одбор. Главната дилема што се наметнува е дали станува збор за колективно тело, или мандатот на секој од членовите му завршува по истекот на петте години припишани со закон.

Членовите на Управниот одбор на 31 јули веќе добиле известување потпишано од претседателот на Советот на МРТ, Слободен Чашуле дека мандатот им престанува на 31 јули, а известувањето го добиле на 3 август. Нов оглас за избор на нови членови се' уште не е распишан.

И наместо одговорот да го даде собраниската законодавно-правна комисија, членовите на Управниот одбор на 31 јули веќе добиле известување потпишано од претседателот на Советот на МРТ, Слободан Чашуле дека мандатот им престанува на 31 јули, а известувањето го добиле на 3 август. Известувањето се темели на толкувањето на Правната служба на МРТ, додека нов оглас за избор на Управен одбор се' уште не е распишан.

Според Законот за радиодифузија и Статутот на ова претпријатие, Управниот одбор за својата работа одговора пред Советот, кој е задолжен да објави оглас за избор на ова тело. Постојните членови на УО се избрани од претходниот Совет, чиј мандат заврши во април оваа година, кога е избран новиот состав.

Дилемите околу тоа дека нешто се случува во државниот сервис, јавно ги изнесе еден од членовите на Управниот одбор, кој во информацијата испратена до медиумите сугерира постоење на некакво сценарио за групно разрешување во режија на екс-шефот на дипломатија и директор на Македонското радио, Чашуле, направено во координација со пратеникот од редовите на ВМРО-ДПМНЕ, Илија Димоски, па дури и лично премиерот Никола Груевски.

Претседателот на Советот Чашуле ги демантира ваквите тврдења и вели дека е постапено според законот и актите на јавниот радиодифузен сервис. Тој додава дека зад одлуката стои целиот Совет и не е негова лична одлука и се темели на толкувањето на Правната служба на оваа куќа.

Во дописот испратен од членот на УО Ацо Дуковски, тој потсетува дека од вкупно седум членови, само на двајца им изминува мандатот, а останатите пет се на таа позиција различен временски период, од кој последниот е избран пред неполни шест-седум месеци.

Правната дилема што ја изнесува Дуковски е дека и на претходниот оглас тие не биле избрани како група, туку поединечно.

„Не сме слушнале досега дека во некое претпријатие, биле сменети си членови на УО, кога им истекол регуларниот мандат на еден или на двајца членови“, посочува Дуковски. Тој се прашува дали сите овие контроверзни настани, не се нечиј обид, со помош на интриги и незаконски постапки да се предизвикаат одредени состојби во ова јавно претпријатие. Членот на УО смета дека и споменувањето на луѓе од врвот на политиката, кои наводно сугерирале групно разрешување е во функција на самопромоција на Чашуле.

Претседателот на Советот на МТВ, Слободан Чашуле негира дека е изведена незаконска смена на Управниот одбор.

„Законот за радиодифузија е јасен и во него е наведено дека Советот го избира Управниот одбор. Мандатите на членовите не се индивидуални и тие се колективно тело. Зарем оној што ќе дојде на местото на пратеник кој ќе биде избран на некоја функција, добива нови четири години, или толку колку што трае мандатот на целиот состав“, потенцира Чашуле. За него е логично новиот Совет на МТВ да избере нов Управен одбор, кој нему ќе му одговара за своите одлуки.

Чашуле тврди дека побарале и толкување од надлежната парламентарна комисија, но од таму им било речено дека Законот е јасен и нема потреба од автентично толкување.Токму од тие причини било побарано мислење од правната служба на МТВ.

„Советот ја донесе ваквата одлука во полн состав и зад неа стојат сите членови, но очигледно некому му штрчело моето име и затоа го споменува“, додава Чашуле. Тој им советува на постојните членови на УП да си ја пробаат среќата и да се јават на конкурсот што допрва ќе се објави.

Дека сепак, имало отворени дилеми и нејаснотии потврдува и претседателот на Управниот одбор на оваа медиумска куќа, Крсто Скубев.

„Јас не сум правник, туку продуцент и не можам да знам дали е нешто во согласност со законот. Оние што се за тоа задолжени треба да дадат правно мислење, а ние ќе го почитуваме. Одговорноста е на собраниската комисија и на Советот на МРТ, кои се наш надреден орган“, заклучува првиот човек на УО на јавниот радиодифузен сервис.