Штипскиот градоначалник ќе ги сели станарите од „белата куќа“

Иван Бојаџиски

ШТИП - Општествено-политичките и Боречката организација, Синдикатот и другите субјекти што користат деловен простор во зградата во Штип позната како „белата куќа“ ќе мора да се селат. Општината го бара просторот од 600 квадратни метри поради зголемените потреби и активности. Идејата за расчистување на сметките за просторот со кој располага општината ја отвори градоначалникот на Штип, Зоран Алексов. Уште пред неколку месеци тој најави ваква расврска, но прозваните тогаш го поставија прашањето за сопственоста на имотот.

На вчерашната прес-конференција градоначалникот Алексов покажа документ од кој се гледа дека спорната зграда, која е залепена до општинскиот објект, и' припаѓа на локалната самоуправа и на државата.

„Сите станари во тој дел, СДСМ, ЛДП, СП, Синдикатот, боречката организација со децении го користат просторот, а не плаќаат кирија и сметки за комуналии. Сите нивни трошоци се покривале од општинскиот буџет. Само во последните 4,5 години износот се зголемил на 30.000 евра. Ние немаме право на таков неодговорен начин да ги трошиме парите на граѓаните“, порача Алексов.

Претседателот на боречката организација Илија Ѓосевски е изненаден од потегот на градоначалникот. „Ние сме државотворна организација и имаме право на скромно парче деловен простор за нашите активности. Во зградата сме 32 години и никому досега не му паднало на ум да не' сели. Наша делегација беше кај градоначалникот. Тој им рекол дека нема ништо против борците, но оти има против раководството на организацијата што, според него, било поврзано со некоја политичка партија. Одговорно тврдам дека ние не сме поврзани со политичка партија и оти настојуваме со сите да имаме коректни односи. Ако треба да се селиме ќе го направиме и тоа. Но, ќе биде нашиот прв пораз и тоа во мирновременски услови“, коментира Ќосевски.

Сега спорната зграда е предадена во употреба на 8 ноември 1976 година. Градена е со пари од г��аѓаните и од државата. Во неа беа сместени сите тогашни општественополитички организации. Сега аргументирано се докажа во чија сопственост е имотот. Како понатаму ќе се одвиваат настаните, останува да се види.