Неизвесна туристичка сезона во Охрид

За првомајските празници речиси нема поголеми резервации од домашни и од странски гости

Симон Илиевски

ОХРИД - Пристигнувањето на првата група со 130 холандски туристи од најавените пет илјади што ќе престојуваат во Македонија вчера го означи почетокот на сезоната. Групата што вчера изутрина слета на аеродромот „Александар Велики“ со чартер-лет од Холандија, беше пречекана според македонските обичаи. Туристите беа послужени со леб и сол, но и со торта, која специјално ја подготви раководството на аеродромот. Холанѓаните ги слушнаа и звуците на македонските ора. Секој турист доби подарок од Градот Скопје, Министерството за економија и од винарската визба „Попова кула“.

И покрај враќањето на Холанѓаните како традиционални гости охридските туристички работници се во голема неизвесност каква ќе биде годинашнава главна туристичка сезона. Загриженоста е оправдана, бидејќи овој викенд што се совпаѓа со првомајските празници речиси да нема поголеми резервации од домашни и од странски гости. Погледите на хотелиерите се свртени спрема гостите од соседните земји. Сегашните процени велат дека летово најбројни ќе бидат домашните гости. Првенствено младите што за пониски цени во приватното сместување и со добра забава ќе го минат летниот одмор во Охрид.

„Доаѓањето на Холанѓаните е добар знак дека ќе го обновиме старото пријателство. Се надевам дека по нивниот пример ќе тргнат и гостите од другите западноевропски земји што пред две децении беа присутни на охридското крајбрежје“, изјави градоначалникот на Охрид, Александар Петрески. Тој вели дека ова лето ќе доаѓаат и гости од Израел, но тоа е малку за целосно пополнување на капацитетите. Сепак, за Петрески се најважни подготовките и креирањето понуда што ќе биде прифатлива и конкурентна барем на пазарите во соседните земји. Локалната самоуправа мора да направи многу, но тоа, според градоначалникот, е залудно доколку не се направи заедничка национална стратегија за поддршка на туризмот.

Туристичките агенции од земјите во соседството водат вистинска пропагандна војна за да привлечат што поголем број гости. Се нудат ниски цени на аранжманите, евтини авионски билети, плаќање на рати и други поволности. Од македонските туристички асоцијации, барем засега, никој не размислува за офанзива што подразбира понуда на конкурентни пакети за потенцијалните туристи и, се разбира, аранжмани со прифатливи цени.

Таквата пасивност може скапо да чини затоа што Охрид и летово може да остане полупразен.

„Продолжуваме со истата практика да чекаме гостите сами да дојдат, несвесни дека живееме во ново време во кое конкуренцијата е огромна. Потребни ни се нови луѓе, со нови идеи, кои Охрид поинаку ќе им го претстават на потенцијалните посетители“, вели хотелиер што повеќе години работел во голем капацитет, а сега успешно се справува со конкуренцијата нудејќи неколку современо уредени апартмани.

Агенцијата за промоција на туризмот учествува речиси на сите поголеми туристички берзи и остварува билатерални контакти со туристичките асоцијации во многу земји. „Тоа го правиме континуирано за да му помогнеме на македонскиот туризам, но резултатите не можат да дојдат преку ноќ“, вели директорот на оваа агенција Зоран Стрезоски. Тој сугерира дека во нивната кампања со привлечни и конкурентни туристички пакети треба да се вклучат хотелите, рестораните и сите бизнис-структури што се поврзани со туризмот.

Песимизмот за резултатите од годинашнава главна туристичка сезона го ублажуваат сопствениците на помалите хотели и апартмани, како и угостителите. „Сликата не е толку црна зашто, според наше искуство, од соседните држави во сопствена режија доаѓаат илјадници туристи. Тие меѓу себе си го препорачуваат Охрид, што е и најголема пропаганда за нас“, вели Митко Пендов од угостителскиот еснаф.