Црквите не можат сами да го решат проблемот

Македонскиот и српскиот претседател, Иванов и Николиќ, ќе се заземат за почести средби меѓу цркoвните власти за да се надмине единственото отворено прашање меѓу двете земји

Горан Адамовски


Македонија и Србија имаат отворени прашања и проблеми, но тие не се нерешливи, констатираа претседателите на двете земји, Ѓорге Иванов и Томислав Николиќ при вчерашната средба во Скопје. Во рамките на нивните надлежности, тие ќе помогнат да се реши црковниот спор, ќе инсистираат на почести средби меѓу претставниците на МПЦ и на СПЦ, оти тие самите, според Николиќ, „не можат сами да го решат проблемот, барем не во овој век“.

Разговорите околу непризнавањето на Македонската православна црква оставија печат на дводневната посета на новиот српски претседател, кој ја одбра Македонија за својата прва официјална посета. Вели дека не го сторил тоа случајно, пред се' заблагодарувајќи се што нашите власти овозможиле Србите да ја прослават 100-годишнината од почетокот на Балканските војни, при што „српската војска ги ослободило Косово и Скопје од Османлиите“.

„Сакаме соработка со сите земји, посебно со балканските. Целта е и да порачаме дека сакаме добри односи и со оние земји што ја признаа независноста на Косово. Го прифаќаме правото на локалните власти да ја водат политиката така што ќе обезбедат поголем просперитет за своите граѓани“, помирливо зборуваше српскиот лидер познат по националистичките ставови.

На новинарското потсетување дека пред една година, додека беше во опозиција, даде интервју во кое при победа на изборите најави преиспитување на одлуката на Србија за признавање на уставното име на Македонија, без заобиколување вели дека сега се смениле работите.

„Тоа го кажав понесен од емоциите поради македонското признавање на Косово. Но, и тогаш реков дека е срамно протерувањето на македонскиот амбасадор од Белград, оти покажавме сила на помали од нас. Денеска сум претседател и морам да размислувам како одлуките ќе се одразат врз мојата земја. Србија не размислува за менување на ставот кон уставното име на Македонија“, рече Николиќ.

Тој рече оти е нормално да бидат коментирани неговите изјави (мислејќи на грчкиот протест по неговата неодамнешна изјава оти ги разбира Македонците околу спорот со Грција) и објасни дека Грција и Македонија се пријателски земји за Србија, поради што се надева дека бргу ќе дојде до решение на спорот. Николиќ појасни дека рекол оти има почитување за гордоста на двата народи да инсистираат на името Македонија.

„Ако има искрена желба, ќе се најде решение и за овој проблем“, се надоврза Иванов околу проблемот со Грција.

Двајцата претседатели во вилата „Водно“ разговараа за економската соработка, инфраструктурата, технологијата, а пред се' околу заедничката цел - влез во ЕУ и пречките до таму. Како што рекоа, главно имале идентични погледи, освен околу црковниот спор.

„Се договоривме дека црковните прашања бараат црковни одговори. Ние сме тука само да ги охрабриме црковните авторитети на почести средби, оти само така ќе се најде решение. Нашите надлежности се толку“, истакна македонскиот претседател.

Според Николиќ, решението на спорот во многу ќе зависи и од добрите односи на двете земји, оти, како што вели, ако се уверат граѓаните во искреното пријателството и црквите полесно ќе дојдат до решение. Прашан да ги коментира нападите кон него од бачкиот владика Иринеј, кој се налути што претседателот изразил иницијатива да помогне во спорот, Николиќ смета дека станува збор за недоразбирање.

„Напротив, владиката реагираше на написите во медиумите дека државите не треба да се мешаат во црковен спор. Тоа го сфаќам и како признание дека црквите не можат сами да го решат проблемот, барем не во овој век“, поентираше високиот гостин.

Од Водно, српскиот претседател продолжи во македонското Собрание, каде се сретна со спикерот Трајко Вељаноски. Сообраќајот во Скопје вчера беше парализиран од силното полициско обезбедување.

Денеска Николиќ ќе се сретне со три српски семејства во Валандовско и со Иванов ќе присуствуваат на фестивалот „Валандовска ракија 2012“, а ќе посетат и две винарски визби.

Николиќ дојде на чело на државата пред пет месеци. На неговата инаугурација, не се појавија претседателите на Хрватска, БиХ, Словенија и на Македонија, како протест поради неговите националистички изјави и упорното негирање на геноцидот во Сребреница.