Макрадули во нова улога

Долгогодишниот пратеник влезе во битката за локалните избори, најавувајќи дека ќе го урне митот за Скопје како вмровски град

Александра М. Митевска


Напуштање на „кич-идеологијата на споменици и на трупање барок на секоја фасада или зграда“ и фокусирање на функционалните потреби на граѓаните, вети Јани Макрадули (47) откако партиската централа го лансираше за кандидат за градоначалник на Скопје на локалните избори во март следната година.

Во првиот настап по номинацијата, Макрадули, очекувано, го критикуваше владиниот проект „Скопје 2014“: „Тоа не значи дека ќе бидеме деструктивно настроени кон она што е веќе изградено, туку единствено значи дека ќе го ставиме граѓанинот на прво место“, рече Макрадули.

Неговата кандидатура за градоначалник на главниот град предизвика големо изненадување во политичката јавност, која во последните денови беше бомбардирана со разни комбинаторики околу можните адути на опозицијата за главниот град. Но, во ниту една од комбинациите не се споменуваше долгогодишниот член на раководството на СДСМ, кој подолго од една деценија е еден од најекспонираните пратеници (моментно е потпретседател на парламентот), носител на партиските листи во Петтата и во Шестата изборна единица на парламентарните избори и жесток критичар на владејачката гарнитура во изминатите шест години.

Членовите на Градскиот (скопски) одбор и на Извршниот одбор на СДСМ, со акламација, го одобриле изборот на Макрадули. Сепак, повеќето од нив, исто така, биле изненадени кога на состанокот што се одржа завчера им било соопштено кој ќе ја добие главната улога на локалните избори откако Стевчо Јакимовски цврсто одлучи и оваа изборна битка да ја води во Карпош, а секретарот Андреј Петров и потпретседателите на партијата не покажаа поголема амбиција директно да се вклучат во битката за локалните избори, на кои опозицијата и' даде плебисцитарно значење, од аспект на можноста тие да бидат увертира во смена на централната власт.

Другите номинации што ги утврди завчера раководството на најголемата опозициска партија, главно, се очекувани: Александар Наумовски, член на Скопскиот совет, ќе биде кандидат за градоначалник на Ѓорче Петров, во Бутел ќе се кандидира Коста Начевски, а Кисела Вода му припадна на Љупчо Васовски. Диме Велков, претседател на разгранокот на СДСМ во Аеродром, ќе биде градоначалнички кандидат во оваа општина. Другите скопски општини им припаднаа на партнерите на СДСМ во опозицискиот фронт. Во Центар за градоначалник се кандидира лидерот на ЛДП, Андреј Жерновски, а во Гази Баба - поранешниот градоначалник Борче Стефановски, како кадар на ВМРО-НП. Шуто Оризари се очекува да го добие партија на Ромите од опозициската коалиција, а за Сарај и Чаир допрва ќе се одлучува, иако се очекува опозицискиот фронт таму да им даде поддршка на кандидатите на ДПА, освен ако Мендух Тачи викендов не ја реализира најавата за раскинување на техничката соработка со СДСМ.

Опозициските кандидати за градоначалници на Скопје и на општините во состав на главниот град, официјално, ќе бидат промовирани на протестниот митинг што ќе се одржи в недела на плоштадот „Македонија“. Со овој митинг завршува проектот „Работно лето“, но, велат во СДСМ, почнува уште позасилена кампања против владејачката гарнитура.

Со оглед на досегашниот политички багаж на Макрадули, битката за локалната власт, всушност, ќе биде сосема ново искуство за него, ако не се смета неговиот неколкугодишен советнички стаж во Општина Центар.

Номинацијата на Макрадули, всушност, претставува промена во практиката на избор на кандидатите за градоначалници за главниот град што социјалдемократите ја практикуваа во изминатите дваесетина години. СДСМ првпат се осмели за најважната функција во локалната власт да кандидира автентично партиско решение. Во изминатите циклуси локални избори, македонската левица, главно, се потпираше на кандидати надвор од партиското јадро - независниот Јовица Угриновски - во 1996 година, Ристо Пенов од ЛДП - во 2000 и 2005, Тито Петковски од НСДП - во 2009.

Макрадули влезе во изборната трка за градоначалници со изјава - дека ќе докаже дека „Скопје не е вмровски град“. Нему и на кандидатите за градоначалници на скопските општини, веројатно, ќе им треба многу енергија во обидот да ја исполнат оваа амбиција, ако се има предвид дека во изминатите две децении социјалдемократите немаа многу среќа на локалните избори во главниот град.

Нивните досегашни градоначалници во скопските општини се бројат на прсти. Со исклучок на Карпош, кој речиси цело време на под контрола на левицата, социјалдемократите, досега имале и по еден градоначалник во Кисела Вода, Ѓорче Петров и во Центар. Овој пат од „Бихаќска“ велат дека избирачкото расположение е сменето во нивна полза, при што особено типуваат на општините Карпош и Центар, а потоа и на Ѓорче Петров и на Бутел.

ВМРО-ДПМНЕ: Кандидат за пораз


Од ВМРО-ДПМНЕ реагираа вчера на изборот на опозицијата за кандидат за скопски градоначалник: „Секому му е јасно дека Јани Макрадули е изборот на Бранко Црвенковски не за победа, туку за пораз на наредните избори. Ниту најблиските соработници на Црвенковски не веруваат дека е возможна политичка победа и затоа тие избегаа од можноста да се кандидираат за градоначалници“, се наведува во соопштение на ВМРО-ДПМНЕ.

Според владејачката партија, Макрадули уште првиот ден како кандидат за градоначалник почнал да настапува агресивно и, како што се наведува, со навреди и манипулации.