Мое ќоше

Одлучуваат Александра и Александар

Ерол Ризаов

Ако ураганот „Сенди“ му помага да победи на изборите на Обама, на нашиот премиер Груевски му го чува тронот лично Александар

Кој ќе победи на изборите во Америка и во Македонија, по се' изгледа, ќе одлучат Александра и Александар.

Многумина се убедени дека ураганот „Сенди“ (нагалено од Александра) би можел да ги спаси Америка и светот од Ромни и неговиот радикален потпретседател Рајан. Колку и да изгледа тоа апсурдно, силниот ветер му дува во грбот на Обама, кој управува со кризниот штаб од Белата куќа и како претседател на најмоќната земја во светот се справува со најголемата бура што го има погодено источниот брег на Америка и Њујорк. Двајцата претседателски кандидати ја прекинаа предизборната кампања каква што беше планирана и тргнаа да го ловат ураганот. Во оваа нова улога е посилен Обама, бидејќи како на актуелен претседател му стојат на располагање сите механизми на власта и моќните институции на системот. На Ромни не му преостанува ништо, туку да ги лови пропустите, злоупотребите и неправдите на бирократијата вообичаени при вакви несреќи на што посебно се чувствителни луѓето.

Ако на Обама му помага ураганот „Сенди“ да освои уште еден мандат, на нашиот премиер Груевски му помага лично Александар. Двете несреќи се многу различни. Едната е според законите на природата и не може да се спречи, ама можат да се ублажат последиците, а другата е грешка на човечки фактор и како што одминува времето последиците се потешки. Штетите од бурата и ураганот брзо или побавно се надоместуваат и се пресметуваат до последниот цент. Човечките жртви остануваат ненадоместливи за навек. Катастрофата од митови во политиката и потрагата по пославно минато не можат никогаш ниту да се проценат ниту да се надоместат. Загубите се огромни, трајни и трагични. Нема човечки жртви, ама има исчезнување на цели држави и нации кои снемуваат во изолација. Има многу такви примери во историјата. Со политичка интервенција во науката и во уметноста да се постави Александар Македонски на скопскиот плоштад е рамно на катаклизма за интересите на Македонија и нејзините граѓани. Не го заробивме ние на скопскиот плоштад Александар Македонски како што извика лидерот на опозицијата, Бранко Црвенковски, на митингот некни, туку Александар јавнат на грчкиот тројански коњ заедно со татко му Филип Втори не' зароби сите нас од Гевгелија до Табановце и ја оправда грчката налудничава политика на ултиматуми. Тоа го направи исто како пред 2.300 години кога го ширеше хеленизмот и грчката култура низ светот. Разликата е во тоа што тогаш беше жив и тоа го правеше со помош на својот меч и војска. Денес го направи тоа окован во петпарачка бронза од скопскиот плоштад со помош на умот на оние што мислат дека се негови следбеници и внуци. Пред да го поплави античката бура Скопје и пред да дојава Александар на скопскиот плоштад, малкумина во светот имаа разбирање и оправдување за грчките уцени и ултиматуми. Сите ја исмеваа таа грчка националистичка и шовинистичка политика кон безопасниот и мирољубив сосед. Денес сите ни се потсмеваат нам. Угледната медиумска агенција Асошиетед прес го нарече Скопје престолнина на кичот. Со неколку тона безвредна бронза како влог за освојување на власта ги избришавме меморандумите и декларациите на над 130 земји и исто толку влади и парламенти кои не' признаа под уставното име. Откако го поставивме Александар, никој од преостанатите позначајни земји не не' призна, освен некои проблематични диктатури. Обратно, оние што од поодамна не' признаа со уставното име, меѓу кои и големите сили Русија, Америка и Кина, се' погласно викаат дека ќе го прифатат тоа име што ќе го договорат двете земји.

Има уште една многу значајна разлика меѓу американскиот и македонскиот ураган. Таму бурата првпат по 1888 година на два дена ги затвори финансиските империи - Њујоршка берза и Волстрит. Вредноста на акциите што се тргуваат дневно изнесува 45 милијарди долари, а се тргуваат околу 1.6 милијарди акции. Дневниот промет на Њујоршка берза се движи од 20 до 60 милиони долари. Кај нас, откако оживеаја македонската империја и дојава Александар Македонски, Берзата од страв падна во кома. Дневно прометот на Берзата падна на ниво на една скопска самопослуга. Нашиот премиер често дига чалам дека сме прваци по реформи во светот и по реформскиот амбиент. Како поранешен брокер, сигурно знае дека нема попрецизна мерка за бизнис-климата во една држава од она што се случува на берзата. Таму е срцето на деловноста и на амбиентот. Македонската берза последните години тоне длабоко под вистинската вредност на компаниите. Ако акциите се под нивото на нивната вредност, односно се продаваат многу поевтино отколку што чинат, а никој не ги купува, тогаш се' е јасно и за амбиентот, и за климата, и за јачината на кризата и на ураганот и на бурата.

Дали Александар ќе јава и напролет на изборите зависи од тоа до каде дошла поплавата - до гуша или веќе е над устата.