Џорџ Лукас подарува четири милијарди долари за образование

Режисерот изјавил дека парите од продажбата на компанијата „Лукасфилм“ ќе ја подари на фондација која се занимава со образование

Американскиот режисер Џорџ Лукас изјавил дека парите од продажбата на компанијата „Лукасфилм“ ќе ја подари на фондација која се занимава со образование.

Компанијата „Дизни“ минатата седмица соопшти дека платила 4,05 милијарди долари за купување на студиото „Лукасфилм“, во кое е снимен познатиот серијал на научнофантастични филмови „Војна на ѕвездите“.

„Во текот на изминатите 41 година, најголемиот дел од своето време и пари ги вложив во компанијата. Сега кога свртувам нова страница во својот живот, сакам повеќе да се посветам на хуманитарната работа“, рекол Лукас.

Засега не е познато која организација ќе ја добие оваа огромна сума на пари, но се претпоставува дека тоа би можело да биде фондацијата „Едутопија“, со која Лукас претседава, а која помага иновативни училишни проекти.

„Поголемиот дел од своето богатство го наменив за подобрување на образованието. Тоа е клуч за опстанокот на човечката раса. Мораме да ја планираме нашата заедничка иднина, а она што треба да го направиме е на нашите деца да им обезбедиме општествени, интелектуални и емоционални орудија. Како луѓе, нашите најголеми орудија за преживување се нашата способност за размислување и приспособување“, истакнал Лукас во едно писмо од 2010 година.

„Наша задача како воспитувачи, раскажувачи и комуникатори е да продолжиле тоа да го правиме и понатаму“, заклучил режисерот.