Нобеловецот Мо Јан близок со член на Шведската академија?

Пред извесно време се јавија сомневања во однос на пристрасноста на Шведската академија при донесувањето на одлуката за добитникот на Нобеловата награда за литература

Годинашниот добитник на Нобеловата награда за литература, кинескиот писател Мо Јан, е пријател со шведскиот академик Јоран Малмквист. Тоа произлегува од еден предговор, кој Мо Јан го напишал за неодамна објавената книга на Малмквист.

Шведската телевизија пред извесно време јави за сомневањата во однос на пристрасноста на Шведската академија при донесувањето на годинашната одлука за добитникот на Нобеловата награда за литература.

Во тој контекст беше потенцирано дека шведските преводи на книгите на Мо Јан ги направил академикот Малмквист, со што беше поставаено прашање за пристрасен однос, така што Малмквист лично се заложил и работел наградата да ја добие токму Мо Јан.

По повод таквите написи во медиумите, постојаниот секретар на Шведската академија Петер Енглунд ги отфрли споменатите сомневања.

Но, Шведската телевизија денеска објави нови податоци, според кои соработката меѓу Малмквист и Мо Јан е поголема и посеопфатна отколку што досега било познато. Тие двајца се познаваат од поодамна и меѓусебно се нарекуваат пријатели.

Кога Малмквист ја објавил својата последна книга во Кина, „Мојата златна рибичка може да го пее Моцарт“, само неколку месеци пред Мо Јан да стане Нобеловец, предговорот за кинеското издание на акедмикот Малмквист го напишал токму Мо Јан.

Веќе на првата страница во книгата се гледа дека Малмквист и Мо Јан се познаваат мошне добро.

- Тоа што нашиот пријател „Стариот Мо“ е волен да напише предговор за оваа антологија не прави мошне задоволни, наведува, меѓу другото, Јоран Малмквист во својата книга објавена во Кина.