(ФОТО) Европратеникот Ховит го посети основното училиште „Димо Хаџи Димов“

Во редовна настава на училиштето се вклучени 28 ученици со различни посебни потреби, што воедно го прави едно од најинклузивните на територијата на Македонија

ФОТО: Петр Стојановски

Ричард Ховит, известувач за Македонија во Европскиот парламент, денеска го посети основното училиште „Димо Хаџи Димов“ во општина Карпош при што имаше можност да го види напредокот на социјалната инклузија на децата со посебни потреби.

На посетата, освен инклузивниот тим и наставен кадар кој работи со овие деца, присуствуваа и градоначалникот на Општина Карпош Стевчо Јакимовски и Шелтон Јет, шефот на канцеларијата на УНИЦЕФ во Македонија.

Во ова училиште во редовна настава се вклучени 28 ученици со различни посебни потреби, што воедно го прави едно од најинклузивните училишта на територијата на Македонија.

- Сакам да се запознаам со она што го прави ова училиште за децата со посебни потреби. Моја работа е оваа држава да влезе во Европската унија, затоа што тоа е подобро за сите граѓани, а посебно за лицата со посебни потреби. Токму затоа инклузијата на лицата со посебни потреби е дел од критериумите во процесот на евроинтеграции, истакна европарламентарецот Ховит.

Она што е посебно и различно, а што се применува во ООУ „Димо Хаџи Димов“, додаде тој, би сакал да го имплементираме и во другите општини во замјата.

Директорката Зорка Ристова, говореше за тридецениската традиција на вклучување на децата со посебни потреби во редовната настава во ова училиште.

За таа цел, рече, е формиран посебен Инклузивен тим кои работи со посебни образовни програми и адаптирање на редовната наставна програма за овие ученици.

Според Милка Ивановска, училишниот педагог и координатор на Инклузивниот тим во ова училиште, социјалната инклуција на овие деца прво почнала самоиницијативно, но сега веќе има поширока поддршка пред се од општината. Во фаза се формирање на поттимови за индивидуални пристапи, поттим за дефинирање на категоријата на децата со посебни потреби, како и тим за промоција на сите активности на инклузивираните ученици.