Измерете си интелигенција и конкурирајте за ��оветник

Необичен оглас осамна: само лица со коефициент на интелигенција 140 се пожелни за министерски советници

Јасмина Јовановска-Вељановска


Министерот за здравство Никола Тодоров вчера објави необичен оглас преку кој бара нови советници, кои ќе работат на сложени анализи во здравството. Прв од четирите услови кои треба да ги исполнат кандидатите е да имаат коефициент на интелигенција (IQ) 140, што ќе го докажат со диплома од МЕНСА. Лицата со ваков IQ, според меѓународните стандарди, се смета дека имаат посебна интелигентна дарба или се натпросечно интелигентни луѓе. Кандидатите може да бидат економисти, лекари, социолози, па дури и новинари со најмал просек на успех 8. Треба да имаат диплома од Универзитетот "Св. Кирил и Методиј" и да познаваат барем два странски јазици.

„Идејата е натпросечно интелигентните лица во земјава да ги ставам во функција на државата. А со нив сметам дека ќе донесам поквалитетна одлука, или пак ќе го увидам решението кое го имам на маса, но можеби не го гледам. Посебно што за ултраинтелигентните лица се знае дека на ист проблем секогаш гледаат од различен аспект. Тие ќе даваат предлози, а јас на крај ќе го дадам конечниот збор“, одговори за „Утрински весник“, министерот Тодоров на прашањето зошто се одлучил на уникатен критериум за барање нови советници, каков што досега немало во ниту еден оглас објавен од државните институции.

Го прашавме и кое ќе биде првото прашање на кое ќе работи комитетот, но министерот не знаеше, и рече дека може и од нив ќе произлезе некоја иницијатива за некој проблем.

„Не сакам да правам негативна селекција на кандидатите, како порано, кога на работа се примале луѓе кои се под ниво на директорот или министерот за да може да ги контролира. Не се срамам советниците, посебно овие од комитетите, да бидат над моето интелигентно ниво ако со нивните ставови се донесе подобра мерка за некој проблем“, вели Тодоров и додава дека и сега во неговиот кабинет има неколку советници со висок коефициент на интелигенција. Министерот не откри кои се тие советници и колкав е нивниот интелигентен статус.

Ова е втор оглас во рок од десетина дена со кој министерот бара надворешни советници кои ќе работат на подобро здравство. Прво се бараа кандидати за комитет за развој на здравството, а сега советници за здравствени анализи.

И овој комитет, како и првиот ќе брои од седум до десет лица и тие нема да бидат вработени, туку ќе бидат месечно ангажирани, вели министерот, но не откри од кои извори на средства ќе бидат плаќани овие советници. „Тие ќе се повикуваат по потреба еднаш до двапати месечно. И вкупниот буџет за еден комитет ќе изнесува од 30 до 35.000 денари“, вели Тодоров.

Министерот смета дека ќе има интерес, без оглед што се во прашање натпросечно интелигентни лица кои треба да работат за хонорар од 50 евра. „Еве на конкурсот за комитетот за развој на здравството, кој заврши вчера, се пријавија околу 50 кандидати. А меѓу нив има од разни профили дури и економист кој познава дури четири јазици“, коментира Тодоров.

Според сознанијата на Министерството за здравство и контактите со МЕНСА -Македонија, во земјава се проценува дека има околу стотина лица со IQ 140.

Mеѓу 16 најинтелигентни во светот и тројца Балканци

На листата на 16 најинтелигентни луѓе во светот, според Светскиот директориум за гении, кој го креирал

д-р Џејсон Бетс, се наоѓаат и двајца Хрвати и еден Босанец.

Двајцата Хрвати го заземаат третото и 16. место. Трет по интелигенција е 42- годишниот Мислав Предавец со IQ 192, кој моментално е професор по математика во Загреб. Со IQ 169 е Иван Ивец, член е на МЕНСА во Хрватска и предава напредна математика. Босанецот Ведран Глишиќ има IQ 175 и вели дека сака експериментална музика, математика и шах.

Со најголем коефициент на интелегенција и тоа 198 е 36-годишниот Грк Евангелос Кациулис, кој има IQ 198. Работел како психијатар, а има диплома од филозофија, медицинска истражувачка технологија и психофармакологија. Со него во постојан натпревар е Американецот Рик Роснер со IQ 192, кој е на второ место на листата на најителигентните. Тој вели дека понекогаш е буден и 20 часа за да доврши тест за интелигенција додека се натпреварува со својот грчки ривал.