15.11.2012, 16:48 Америка задоволна од одговорот на меморандумот
Според амбасадорот Волерс, позитивно е одговорено на некои од прашањата, иако не е на сите, но пораката и од грчка страна била дека не станува збор за документ „земи или отфрли“
Слободанка Јовановска
Прилично добар- е оценката на амбасадорот на САД, Пол Волерс, за одговорот на грчкиот меморандум што го испрати шефот на дипломатијата, Никола Попоски, неодамна.
Според Волерс, во него е позитивно одговорено на некои од прашањата, иако не е одговорено на сите, но пораката и од грчка страна била дека не станува збор за документ „земи или отфрли“. „Добро е д�� има дијалог меѓу Македонија и Грција“, заклучи Волерс на денешната прес-конференција, генерално оценувајќи дека за него ова е добар чекор. Американскиот амбасадор ја поздрави и најавената средба во Њујорк на медијаторот Метју Нимиц со грчкиот и македонски преговарач, бидејќи како што оцени средба немало долго време, но не сака да предвидува што може да резултира од неа.
Запрашан околу слободата на медиумите во Македонија, со оглед на претходните критики од американска страна дека постои загриженост на овој план, Волерс го спомна прифаќањето на законот за декриминализација на клеветата, но јасно посочи дека работата со тоа не е завршена, и дека САД и натаму ќе ги следат спорните прашања околу финансирањето на медиумите, сопственичката структура и притисоците.
„Треба да видиме како ќе се имплементира измената на законот. Но ова е добар чекор“, порача Волерс. Тој не сака да лицитира дали САД или Турција се најдобар пријател на САД, откако новинарите му посочија дека со првата земја македонскиот државен врв имал повеќе средби на високо ниво а државната секретарка Хилари Клинтон ја избегнува постојано Македонија. Според него Клинтон имала многу згуснат календар и посетувала земји во кои имало итни прашања за решавање. „Не се тркаме со Турција кој е најдобар пријател на Македонија. Сакаме земјава да ги исполни критериумите и да влезе во ЕУ и НАТО. Сакаме Македонија да биде најдобра што може“, изјави Волерс.
Според него исходот од изборите во САД нема да има влијание на односите со нашата држава и дека двете земји остануваат пријатели и партнери, но кога беше прашан дали истите чувства ги дели и Македонија кон САД одговори - се надевам.
|
