16.11.2012, 15:24 Над 400 телевизиски програми со дигитализацијата
Квалитетен сигнал и дополнителни сервиси најавуваат надлежните инсттиуции со воведувањето на дигитализацијата од следната година
Над 400 телевизиски канали, квалитетен сигнал и дополнителни сервиси треба да овоможи процесот на дигитализација кој што треба да се воведе од 1 јуни идната година. Со тоа македонските граѓани ќе ја следат телевизиската програма преку дигитален сигнал, но ќе добијат и зголемена понуда на телевизиски програми, која надлежните најавуваат дека треба да се збогати од сегашните 49 на 400 програми.
Претставници на Министерството за информатичко општество и администрација, Советот за радиодифузија и Агенцијата за електронски комуникации и телевизиите што ќе добијат пренос на сигналот на национално и регионално ниво, денеска дебатираа околу претстојните активности до стартот на дигитализацијата во земјава.
Компанијата ОНЕ е избрана за оператор што преку два мултиплекса со дигитален сигнал ќе ги емитува сервисите на комерцијалните национални и регионални телевизии за надомест што ќе го утврди.СРД наскоро треба да усвои план за намена и распределба на радиофрекфенции на дигиталниот терестријален мултиплекс, а АЕК ќе има целосна регулација односно ќе ја утврдува оправданоста на цената што ќе ја нуди ОНЕ. Операторот веќе исплатил 300.000 евра за дозволата за оперирање со мултиплексите, а со милион евра гарантира дека ќе постави мрежа и опрема за дигитализацијата.
Според министерот за информатичко општество, Иво Ивановски ќе се овозможат и нови формати на медиуми и нов начин на пристап до корисниците. „Тој процес треба да се одрази и на квалитетот на содржините што ќе ги нудат телевизиите затоа што се надеваме дека конкуренцијата ќе биде многу поголема и граѓаните ќе имаат поголема можност за избор“, оцени Ивановски.
Според претседателот на Советот за радиодифузија, Зоран Трајчевски, веќе е изработен нацрт-планот за намена и распределба на радиофрекфенции на дигиталниот терестријален мултиплекс, што ќе биде усвоен наскоро како стратешки документ.
„Спремни сме да им помогнеме на медиумите во преминот од аналогно кон дигитално емитување и сметам дека моментно не постојат никави пречки“, вели Трајчевски. Надоместот за преносот, што телевизиите ќе го плаќаат на операторот ќе зависи од операторот и од договорот што ќе се постигне.
Краен рок за исклучување на аналогното емитување на телевизиските содржини во Европа е 2015 година, а го утврди Интернационалната телекомуникациска унија. Обврската за дигитализација е меѓународна, но сепак секоја земја одлучува за начинот на кој ќе премине кон дигитално емитување.
|
